Դատախազությունը՝ «Օազիս» սրճարանի դիմաց տեղի ունեցած դեպքի վերաբերյալ

Մամուլը վերջին օրերին բազմիցս անդրադարձել է 2010թ. նոյեմբերի 2-ին Վանաձոր քաղաքի «Օազիս» սրճարանի դիմաց Ա. Փիրիխանյանի առողջությանը դիտավորությամբ ծանր վնաս պատճառելու դեպքի առթիվ հարուցված քրեական գործին՝ վիճարկելով տվյալ գործով որպես մեղադրյալ ներգրավված Շ. Մանուչարյանին կալանքի տակ պահելու անհրաժեշտությունն ու հիմքերը:

Հաշվի առնելով հանրության հետաքրքրությունը՝ պարզաբանում ենք, որ Ա. Փիրիխանյանին մարմնական վնասվածք պատճառելու դեպքի առթիվ նույն օրը ոստիկանության Լոռու մարզի քննչական բաժնում հարուցվել էր քրեական գործ՝ ՀՀ քրեական օրենսգրքի 112-րդ հոդվածի 2-րդ մասի 9-րդ կետով եւ 235-րդ հոդվածի 1-ին մասով: 2010թ. նոյեմբերի 4-ին որոշում էր կայացվել Շ. Մանուչարյանին որպես մեղադրյալ ներգրավելու մասին եւ նրա նկատմամբ հայտարարվել էր հետախուզում:

2012թ. մայիսի 30-ին Շ. Մանուչարյանը հայտնաբերվել եւ բերման է ենթարկվել ոստիկանության Վանաձորի բաժին եւ նույն օրը քրեական գործով կասեցված վարույթը վերսկսվել է: Նրան մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 9-րդ կետով եւ 235-րդ հոդվածի 1-ին մասով:

Քրեական գործի նախաքննության ընթացքում հարցաքննվել են բազմաթիվ վկաներ, հետաքննության մարմնին տրվել են մի շարք հանձնարարություններ, նշանակվել են համալիր դատաձգաբանական, դատաբժշկական, դատաքիմիական, տեսաձայնագրային փորձաքննություններ: Սակայն քրեական գործի նախաքննության օրինականության նկատմամբ հսկողություն իրականացնող դատախազի գնահատմամբ բավարար ապացույցներ ձեռք չեն բերվել՝ նկարագրված արարքը Շ. Մանուչարյանի կողմից կատարելու վերաբերյալ եւ նման պայմաններում դեռեւս հնարավոր չէ քրեական գործը մեղադրական եզրակացությամբ դատարան ուղարկել: Դատախազի՝ 2013թ. հունվարի 28-ի որոշմամբ Շ. Մանուչարյանի խափանման միջոց կալանավորումը փոփոխվել է եւ նրա նկատմամբ խափանման միջոց է ընտրվել ստորագրություն՝ չհեռանալու մասին:

Նախաքննությունը շարունակվում է ոստիկանության Լոռու մարզի քննչական բաժնում:

Նշենք, որ մինչ այդ մամուլում եղել էին նաեւ ականատես վկայի ցուցմունքների արժանահավատությունը կասկածի տակ առնող հրապարակումներ: Ըստ այդմ տեղեկացնում ենք, որ 2013թ. հունվարի 16-ին հսկողություն իրականացնող դատախազի կողմից ցուցում է տրվել քննիչին՝ մի շարք անհրաժեշտ քննչական գործողություններ կատարելու վերաբերյալ: Բացի այդ, մարզի դատախազը գրավոր ցուցում է տվել ոստիկանության Լոռու մարզի քննչական բաժնի պետին՝ միջոցներ ձեռնարկել՝ պարզելու որպես ականատես վկա հարցաքննված անձանց՝ դեպքին իրականում ականատես լինելու հանգամանքը եւ նրանց ցուցմունքների հավաստիությունը, ապահովել դեպքի հանգամանքների լրիվ, բազմակողմանի եւ օբյեկտիվ քննությունը:

ՀՀ դատախազություն