Դոնալդ Թրամփին նվիրել են 321 բնական ադամանդով բացառիկ մատանի

Անտվերպենի Համաշխարհային ադամանդի կենտրոնը (AWDC) ԱՄՆ նախագահ Դոնալդ Թրամփին նվիրել է բացառիկ մատանի՝ ԱՄՆ անկախության 250-ամյակի կապակցությամբ։ Այս մասին տեղեկությունը հրապարակվել է կազմակերպության պաշտոնական կայքում։

Նվերը պատրաստված է 18 կարատանոց ոսկուց և զարդարված է 321 բնական ադամանդով ու ևս 75 թանկարժեք քարերով։ Մատանու հեղինակը Անտվերպենի հայտնի ոսկերիչ և ադամանդագործ Դավիդ Գոթլիբն է։ Դիզայնը ոգեշնչված է ամերիկյան Super Bowl-ի հաղթողների մատանիներից և խորհրդանշում է ԱՄՆ անկախության 250-ամյակը։

Քանի որ Թրամփը չի կարողացել անձամբ մեկնել Բրյուսել՝ զբաղված լինելով ԱՄՆ-ում անցկացվող տոնական միջոցառումներով, նվերն իր անունից ընդունել է ԱՄՆ դեսպան Բիլ Ուայթը։ AWDC-ի նախագահ Իսիդոր Մյորսելը նշել է, որ այս մատանին խորհրդանշում է ԱՄՆ-ի և Անտվերպենի միջև երկարամյա տնտեսական համագործակցությունը և ընդգծում է բնական ադամանդների նկատմամբ վստահությունն ու դրանց իրական արժեքը։