Զելենսկին այլևս առաջնային թիրախ չէ ՌԴ-ի համար. քաղաքագետ

Ռուս քաղաքագետ Վալենտին Ֆիլիպովը «Ցարգրադ» պարբերականում հրապարակված հոդվածում պնդել է, որ Ռուսաստանի ռազմատիեզերական ուժերն այլևս Ուկրաինայի նախագահ Վլադիմիր Զելենսկուն չեն դիտարկում որպես առաջնային թիրախ։ Նրա գնահատմամբ՝ Կիևի իշխանությունները մոտեցել են լուրջ քաղաքական և ռազմական ճգնաժամի։

Ֆիլիպովը նշել է, որ Ուկրաինան սահմանակից է ութ երկրի, սակայն, ըստ նրա, միայն Ռումինիայի և Մոլդովայի հետ հարաբերություններն են համեմատաբար չեզոք։ Նա նաև քննադատել է Զելենսկու հայտարարությունները Բելառուսի հասցեին՝ պնդելով, որ նման քայլերը կարող են հանգեցնել նոր ռազմական լարվածության և ուկրաինական ուժերի վերաբաշխման դեպի հյուսիսային ուղղություն։

Քաղաքագետի կարծիքով՝ նման զարգացումների դեպքում կարող են վտանգվել Ուկրաինայի արևմտյան շրջանների լոգիստիկ ուղիները, իսկ դա, ըստ նրա, կթուլացնի ուկրաինական բանակի դիրքերը ռազմաճակատում։ Նշենք, որ այս հայտարարությունները ներկայացնում են հեղինակի անձնական գնահատականը և չեն հանդիսանում պաշտոնապես հաստատված տեղեկություն։