Չինական BYD ավտոհսկան պատրաստվում է ընդլայնել արտադրությունը Եվրոպայում

Աշխարհի խոշորագույն էլեկտրամոբիլներ արտադրող չինական BYD ընկերությունը նախատեսում է Եվրոպայում գնել ավտոմեքենաների գործարան՝ տարածաշրջանում իր գործունեությունն արագ ընդլայնելու նպատակով։ Այս մասին հայտնում է Reuters-ը։

Աղբյուրի համաձայն՝ գործարքի ամենահավանական տարբերակներն են Իսպանիան և Ֆրանսիան։ Եթե այն կայանա, BYD-ն Եվրոպայում կունենա իր երկրորդ արտադրական հարթակը՝ Հունգարիայից հետո, որտեղ արտադրության մեկնարկը նախատեսված է այս տարվա չորրորդ եռամսյակում։

Reuters-ը նշում է, որ BYD-ի վաճառքները Եվրոպայում շարունակում են արագ աճել․ 2025 թվականին ընկերությունը վաճառել է գրեթե 188 հազար ավտոմեքենա՝ 270 տոկոսով ավելի, քան նախորդ տարի, իսկ 2026 թվականի առաջին հինգ ամիսներին վաճառքը կրկնապատկվել է՝ գերազանցելով 100 հազար մեքենան։ Միաժամանակ ապրիլին չինական ավտոարտադրողների մասնաբաժինը Եվրոպայի էլեկտրամոբիլների շուկայում առաջին անգամ անցել է 15 տոկոսի սահմանը։