Ռյուտտեն և Մերցը հաստատել են ԱՄՆ-ի աջակցությունը Ուկրաինային

ՆԱՏՕ-ի գլխավոր քարտուղար Մարկ Ռյուտտեն և Գերմանիայի կանցլեր Ֆրիդրիխ Մերցը հայտարարել են, որ ԱՄՆ-ի աջակցությունը Ուկրաինային մնում է անփոփոխ և առանցքային։ Այս մասին նրանք նշել են Բեռլինում՝ ՆԱՏՕ-ի գագաթնաժողովից առաջ, հայտնում է The Guardian-ը։

Ռյուտտեն ընդգծել է, որ Ուկրաինայի պաշտպանության հարցում ԱՄՆ-ը շարունակում է լինել «անփոխարինելի գործընկեր»՝ հիշեցնելով նաև Կանադայի և եվրոպական երկրների կողմից ֆինանսավորվող ռազմական մատակարարումների մասին։ Նրա խոսքով՝ արևմտյան դաշնակիցների համակարգված աջակցությունը շարունակում է գործել։

Գերմանիայի կանցլեր Ֆրիդրիխ Մերցը իր հերթին կարևորել է G7-ի վերջին գագաթնաժողովում ընդունված որոշումները՝ նշելով, որ ԱՄՆ նախագահը նույնպես ստորագրել է համապատասխան փաստաթուղթը։ Ավելի վաղ Ֆրանսիայի նախագահ Էմանուել Մակրոնը հայտարարել էր, որ ԱՄՆ-ը այլևս չի ձգտում հանդես գալ որպես չեզոք միջնորդ Ռուսաստանի և Ուկրաինայի բանակցություններում։