Ֆոն դեր Լայեն․ Հայաստանը բախվում է Ռուսաստանի տնտեսական ճնշմանը, ԵՄ-ն պատրաստ է աջակցել

Եվրոպական հանձնաժողովի նախագահ Ուրսուլա ֆոն դեր Լայենը հայտարարել է, որ Հայաստանը շարունակում է բախվել Ռուսաստանի կողմից տնտեսական ճնշումների, սակայն Եվրամիությունը պատրաստ է աջակցել երկրին։

Երևանում վարչապետ Նիկոլ Փաշինյանի հետ համատեղ ասուլիսի ընթացքում ֆոն դեր Լայենը նշել է, որ ԵՄ-ն Հայաստանի համար լրացուցիչ 18 մլն եվրո կհատկացնի՝ առևտրի ամրապնդման, դիվերսիֆիկացման և արտահանման հնարավորությունների ընդլայնման նպատակով։

Նրա խոսքով՝ ֆինանսական աջակցությունը կարող է ուղղվել նաև արտահանման խթանման գործակալության ստեղծմանը, ինչը կօգնի հայկական բիզնեսին մեծացնել արտահանման ծավալները։ Նշված 18 մլն եվրոն հունիսի սկզբին քննարկված 52 մլն եվրո աջակցման փաթեթի վերջին մասն է։

Ֆոն դեր Լայենը հայտնել է նաև, որ ԵՄ-ն առաջարկում է կիրառել ինքնավար առևտրային միջոցներ, որոնց արդյունքում Հայաստանի արտահանման շուրջ 80 տոկոսը դեպի Եվրամիություն կազատվի մաքսատուրքերից։

«Այսպիսով, հնարավոր կլինի ԵՄ միասնական շուկա վերաուղղորդել այն արտադրանքները, որոնք ներկայում հիմնականում արտահանվում են ռուսական շուկա»,- նշել է նա։

Եվրահանձնաժողովի նախագահի խոսքով՝ նախաձեռնությունը ԵՄ շուկան կբացի Հայաստանի թարմ գյուղմթերքի, մրգի և բանջարեղենի արտահանման գրեթե 99 տոկոսի, ինչպես նաև խմիչքների և ոգելից խմիչքների արտահանման շուրջ 90 տոկոսի համար։

Ֆոն դեր Լայենը հավելել է, որ սա համագործակցության ընդլայնման միայն սկիզբն է, և հուլիսի կեսերին Հայաստան կժամանեն եվրոպացի փորձագետներ՝ տեղական արտադրողների և արտահանողների հետ աշխատելու, ինչպես նաև ԵՄ շուկայում առկա հնարավորություններից առավել արդյունավետ օգտվելու նպատակով։