Պաշտոնական․ Նապոլին նոր գլխավոր մարզիչ ունի

Իտալական «Նապոլին» պաշտոնապես հայտարարեց թիմի գլխավոր մարզչի պաշտոնում Մասիմիլիանո Ալեգրիի նշանակման մասին: Այս մասին տեղեկանում ենք armsport.am կայքից։

Նեապոլիտանական ակումբի պաշտոնական կայքի հաղորդագրության համաձայն՝ 58-ամյա իտալացի մասնագետի հետ կնքվել է երկարաժամկետ պայմանագիր, որը նախատեսված է մինչև 2029 թվականի հունիսի 30-ը։

Այս պաշտոնում Ալեգրին փոխարինելու է Անտոնիո Կոնտեին, ով թիմը ղեկավարում էր 2024 թվականից և ակումբից հեռանալու մասին հայտարարել էր մեկ օր առաջ: Նշենք, որ 2025/26 մրցաշրջանում «Նապոլին» վաստակել է 76 միավոր և դարձել Իտալիայի փոխչեմպիոն:

Ալեգրիի նախորդ աշխատավայրը «Միլանն» էր։ Մասնագետը միլանյան ակումբից հեռացվել էր մայիսի 25-ին՝ Ա Սերիայի վերջին՝ 38-րդ տուրում «Կալյարիից» կրած տնային պարտությունից (1:2) հետո: «Ռոսոներիները» մրցաշրջանն ավարտել էին 5-րդ տեղում՝ իրենց ակտիվում գրանցելով 70 միավոր։

Իր հարուստ մարզչական կարիերայի ընթացքում Մասիմիլիանո Ալեգրին 6 անգամ դարձել է Իտալիայի չեմպիոն (5 անգամ՝ «Յուվենտուսի», 1 անգամ՝ «Միլանի» ղեկին), 5 անգամ նվաճել է երկրի Գավաթը, ինչպես նաև երկու անգամ իր թիմերին հասցրել է Չեմպիոնների լիգայի եզրափակիչ։