Մայրասպանի պատիժը

Այսօր՝ փետրվարի 2-ին, Էրեբունի-Նուբարաշեն վարչական շրջանների ընդհանուր իրավասության դատարանում, դատավոր Վլադիմիր Գրիգորյանի նախագահությամբ դռնփակ դատական նիստ էր:

Ինչպես հայտնում է shamshyan.com-ը, Ոստիկանության քննչական գլխավոր վարչության, Երևանի քննչական վարչության Էրեբունու քննչական բաժնի քննիչը, դիմել էր նշված դատարան, որպեսզի Մուրացան 64 տան բնակիչ 44-ամյա Գագիկ Սենեքերիմյանի նկատմամբ դատարանը որպես խափանման միջոց կիրառի երկամսյա կալանք:

Դատավոր Վ. Գրիգորյանը, խորհրդակցական սենյակից դուրս գալով, որոշեց բավարարել քննչական մարմնի միջնորդությունը և Գ. Սենեքերիմյանի նկատմամբ որպես խափանման միջոց ընտրվեց երկամսյա կալանավորումը, որից հետո տեղափոխվեց ՀՀ ԱՆ Նուբարաշեն քրեակատարողական հիմնարկ:

Ինչպես ավելի վաղ հայտնել էր ֆոտոլրագրող Գագիկ Շամշյանը, հունվարի 28-ին՝ ժամը 07:30-ի սահմաններում Մուրացան 64 տան բնակիչ 44-ամյա Գագիկ Սենեքերիմյանը ոստիկանության էրեբունու բաժին հայտնել էր, որ մայրը՝ 75-ամյա Գեղանուշ Մանգյանը աստիճանավանդակներից ընկել և մահացել է:

Նույն օրը Էրեբունու ոստիկանները հաղորդագրություն էին տարածել, որ կինը հանկարծամահ է եղել և նշանակել էին դիակի դատաբժշկական փորձաքննություն:

Մինչ դատական բժշկի եզրակացության ստանալը Էրեբունու ոստիկանները օպերատիվ տեղեկություններ են ստանում, որ նշված տանը հաճախակի տեղի են ունեցել վիճաբանություն կնոջ և նրա մյուս որդու՝ Կարեն Սենեքերիմյանի միջև, ով ամուսնալուծված է եղել և ամեն անգամ բողոքել է, որ պատճառը մայրն է եղել:

Դեպքի օրը Գագիկը քնած է եղել, երբ արթնացել և նկատել է, որ մայրը անկողնում մահացած է, իսկ եղբայրը՝ Կարենը, արդուկելիս է եղել իր հագուստները: Գագիկը Կարենից հետաքրքրվել է, թե տեղյակ է մոր մահվան մասին, նա պատասխանել է, որ չգիտի, թե որտեղ է մայրը, իսկ հետո էլ հայտնել է թե. «փիլաքյանների վրա էր, գլուխը պտտվեց, ընկավ և ես իրեն տեղափոխել եմ ննջարան»:

Երեկոյան ստացվում է դատաբժշկի եզրակացությունը, որով հայտնում են ոստիկանությանը, որ կնոջ մահվան պատճառը բռնությունն է և մահացել է մեխանիկական շնչահեղձության (խեղդամահ լինելու) հետևանքով: Նույն օրը սպանություն կատարելու կասկածանքով Էրեբունու ոստիկանները եղբայրներին բերման են ենթարկում բաժին, որտեղ էլ Կարենը խոստովանում է իր կողմից կատարած դաժան սպանությունը, ով նախ ծեծի է ենթարկել մորը, հետո խեղդամահ արել ու հայտարարել, թե մայրը ինքնագիտակցությունը կորցրել և աստիճաններից վայր է ընկել:

Ոստիկանության Էրեբունու բաժնի քրեական հետախուզության և հետաքննչական բաժանմունքների, ինչպես նաև նույն բաժնի քննչական բաժնի աշխատակիցները բացահայտել էին հունվարի 28-ին Էրեբունի վարչական շրջանում տեղի ունեցած դաժան սպանությունը: