ՔՊ-ն պաշտպանության հանձնաժողովի նախագահի պաշտոնում առաջադրել է Վիլեն Գաբրիելյանին

«Քաղաքացիական պայմանագիր» խմբակցությունը Ազգային ժողովի պաշտպանության և անվտանգության հարցերի մշտական հանձնաժողովի նախագահի պաշտոնում առաջադրել է Վիլեն Գաբրիելյանի թեկնածությունը։ Նրա թեկնածությունն ԱԺ նիստում ներկայացրել է ՔՊ խմբակցության պատգամավոր Սիսակ Գաբրիելյանը։

Վիլեն Գաբրիելյանը ծնվել է 1983 թվականին՝ Խորհրդային Ադրբեջանի Բաքու քաղաքում։ 2005 թվականին ավարտել է Մխիթար Հերացու անվան Երևանի պետական բժշկական համալսարանը՝ ստանալով դեղագետի որակավորում։

Աշխատանքային գործունեության ընթացքում զբաղեցրել է մի շարք ղեկավար պաշտոններ։ 2007-2008 թվականներին եղել է Մարդասիրական օգնության հանրապետական կենտրոնի առաքման բաժնի պետ, 2008-2009 թվականներին՝ «Ալֆա-ֆարմ» ՓԲԸ դեղատնային ցանցի վերահսկողության բաժնի ղեկավար։ 2021-2022 թվականներին ղեկավարել է «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոն» ՓԲԸ-ն։

2021-2025 թվականներին եղել է Ազգային ժողովի 8-րդ գումարման պատգամավոր և պաշտպանության ու անվտանգության հարցերի մշտական հանձնաժողովի անդամ։ Նա նաև ընդգրկված է եղել գերիների, պատանդների և անհայտ կորած անձանց հարցերով զբաղվող միջգերատեսչական հանձնաժողովում։ 8-րդ գումարման ԱԺ-ում ներկայացրել է 32 օրենսդրական նախաձեռնություն, որոնք ընդունվել են խորհրդարանի կողմից։

Վիլեն Գաբրիելյանը 2015 թվականից «Քաղաքացիական պայմանագիր» կուսակցության հիմնադիր անդամ է։ Տարբեր տարիներին եղել է կուսակցության 1-ին, 3-րդ և 5-րդ վարչությունների անդամ։ 2023-2026 թվականներին ղեկավարել է «Գարդման-Շիրվան-Նախիջևան համահայկական միություն» հասարակական կազմակերպությունը։

2016-2018 թվականներին ծառայել է Հայաստանի զինված ուժերում և ունի բուժծառայության ավագ լեյտենանտի զինվորական կոչում։

Իր ելույթում Գաբրիելյանը նշեց, որ հանձնաժողովն առավել պահանջկոտ է լինելու կառավարության գործընկեր կառույցների նկատմամբ։ Նրա խոսքով՝ առաջնահերթություններից մեկն այնպիսի աշխատանքային միջավայրի ձևավորումն է, որտեղ մասնագիտական կարծիքը լսելի կլինի, իսկ օգտակար առաջարկները կստանան գործնական ընթացք։

«Անվտանգությունը պետության ընդհանուր կարողությունն է՝ տեսնելու վտանգները, գնահատելու հնարավորությունները, ժամանակին որոշումներ ընդունելու, պաշտպանելու քաղաքացիներին ու կենսական համակարգերը, ինչպես նաև համախմբելու ներուժը պետական շահի շուրջ»,- ընդգծեց նա։

Գաբրիելյանի խոսքով՝ Հայաստանը կանգնած է լուրջ մարտահրավերների առաջ, սակայն միաժամանակ ունի զգալի հնարավորություններ, և հիմնական խնդիրը դրանց արդյունավետ կազմակերպումն ու պետական կարողության վերածելն է։