Եղոյան․ Ադրբեջանից գազի կամ էլեկտրաէներգիայի ներմուծումը չի բացառվում

«Ատոմակայանն ունի շահագործման ժամկետ, որը չի որոշում ո՛չ Հայաստանի, ո՛չ Ադրբեջանի, և ընդհանրապես որևէ երկրի կառավարություն։ Դա պայմանավորված է ատոմակայանի ֆիզիկական շահագործման թույլատրելի առավելագույն ժամկետով, որը տվյալ դեպքում 2036 թվականն է»,- ԱԺ ճեպազրույցների սրահում հայտարարել է ՔՊ-ական պատգամավոր Արման Եղոյանը՝ անդրադառնալով Ադրբեջանի նախագահ Իլհամ Ալիևի հայտարարություններին Մեծամորի ատոմակայանի վերաբերյալ։

Եղոյանի խոսքով՝ Հայաստանի իշխանությունները քննարկում են նոր ատոմակայանի կառուցման հնարավորությունը և այդ ուղղությամբ բանակցություններ են վարում մի շարք միջազգային գործընկերների հետ։ Նա հիշեցրել է նաև, որ ատոմակայանի վերաբերյալ դրույթներ կան 2017 թվականին ստորագրված Հայաստան-Եվրամիություն համաձայնագրում։

Անդրադառնալով այն տեսակետներին, թե Մեծամորի ԱԷԿ-ի շահագործման ավարտից հետո Հայաստանը կարող է բախվել էներգետիկ խնդիրների, լրագրողը հարցրել է՝ արդյոք Ադրբեջանի կողմից էլեկտրաէներգիայի մատակարարման հնարավորության վերաբերյալ կան ներքին պայմանավորվածություններ։

Հարցը կապված էր նաև Ալիևի այն հայտարարության հետ, թե ադրբեջանցի մասնագետներն ուսումնասիրել են Հայաստանի տարածքը և դիտարկել Ադրբեջանից էլեկտրաէներգիա մատակարարելու համար ենթակառուցվածքների, այդ թվում՝ էլեկտրասյուների տեղադրման հնարավոր վայրերը։

Եղոյանը նշել է, որ էներգետիկ ռեսուրսների և էլեկտրաէներգիայի ներմուծման ու արտահանման հնարավորությունների ընդլայնումը կարող է բխել Հայաստանի շահերից։

«Որքան ավելի բաց ճանապարհներ և տարբեր աղբյուրներից էներգիա ու էներգակիրներ ներմուծելու կամ արտահանելու հնարավորություններ լինեն, այնքան դա Հայաստանի համար օգտակար է։ Սակայն դա որևէ կապ չունի ատոմակայանի հարցի հետ»,- ասել է պատգամավորը։

Ադրբեջանից գազի կամ էլեկտրաէներգիայի հնարավոր ձեռքբերման վերաբերյալ հարցին Եղոյանը կրկին ընդգծել է, որ այդ հարցը պետք չէ կապել ատոմակայանի ապագայի հետ։ Միաժամանակ նա չի բացառել տարբեր էներգակիրների ներմուծման և էլեկտրաէներգիայի արտահանման հնարավորությունը։

«Էներգետիկ փոխանակումը՝ առևտուրը, վաճառքն ու գնումը, ինչպես մյուս ապրանքների և ծառայությունների դեպքում, բնականաբար, չպետք է բացառված լինի երկկողմ առևտրից»,- նշել է ՔՊ-ական պատգամավորը։

Անդրադառնալով TRIPP նախագծին՝ Եղոյանն ասել է, որ աշխատանքներն ընթանում են ակտիվ տեմպերով։ Նրա խոսքով՝ նախագծի շրջանակում արդեն նշանակվել են համապատասխան պաշտոնյաներ ԱՄՆ-ի կողմից, իսկ հայկական կողմն էլ կունենա իր ներկայացուցիչներին։ Միաժամանակ, ըստ նրա, արդեն հստակեցվել է նախագծի իրավակազմակերպական ձևաչափը։

«Կարծում եմ՝ մեկ տարին բավականին օպտիմալ ժամանակ էր աշխատանքների այդ հատվածն իրականացնելու համար։ Իսկ թե կոնկրետ երբ՝ որ օրը, այնտեղ կդրվի առաջին քարը, դժվարանում եմ ասել։ Բայց ընդհանուր առմամբ ամեն ինչ ընթանում է նորմալ և կանխատեսելի ժամանակացույցով»,- ասել է Եղոյանը։