Ռուբեն Հայրապետյանը կներկայանա՞ դատարան

Երևանի Ավան և Նոր Նորք վարչական շրջանների ընդհանուր իրավասության դատարանում դատավոր Էդուարդ Ամալյանի նախագահությամբ այսօր քննվեց Դավիթ Սանասարյանի հայցն ընդդեմ «Հարսնաքար» ռեստորանային համալիրի սեփականատեր, ՀՀ ԱԺ նախկին պատգամավոր Ռուբեն Հայրապետյանի:

Հայցվորը պահանջում է հատուցել իր բարի համբավին, պատվին, արժանապատվությանը և գործարար համբավին պատճառված վնասը: Հայցի առարկան «Նուվել դը Արմենի» ամսագրում սեպտեմբերի 7-ին հրապարակված Ռ. Հայրապետյանի հարցազրույցն է, որն, ըստ հայցվորի, պարունակում է իր բարի համբավը, պատիվը, արժանապատվությունը և գործարար համբավը վիրավորող և իրականությանը չհամապատասխանող զրպարտչական արտահայտություններ: Հայցվորը պահանջում է ներողություն խնդրել վիրավորական արտահայտությունների համար և հերքել իրականությանը չհամապատասխանող զրպարտչական արտահայտությունները:

Lurer.com-ի հետ զրույցում Դավիթ Սանասարյանի ներկայացուցիչ Կարապետ Կարապետյանն ասաց.

«Այսօրվա նիստին դերերի բաշխում տեղի ունեցավ. այն, ինչը մենք համարում ենք վիրավորանք, պետք է ապացուցենք, որ այդ հրապարակումը եղել է, հասանելի է եղել մեծ լսարանի, ուղղված է անձի արժանապատվությունը նսեմացնելուն, վիրավորելուն: Այդ դիտավորությունը վիրավորանք է, թե չէ, մենք ուզում ենք Ռուբեն Հայրապետյանից հարցնենք՝ ինչո՞ւ ես դու այս մարդուն նման բան ասել, ինչո՞ւ ես այդ կերպ արտահայտվել: Այդ իսկ պատճառով դատարանին միջնորդություն ենք ներկայացրել, որպեսզի Ռուբեն Հայրապետյանը հրավիրվի դատարան»:

Նախնական դատական նիստը հետաձգվել է մինչը սույն թվականի մարտի 21-ը։