Ի՞նչ կբացահայտի ոստիկանությունը Մհեր Սեդրակյանի գործի վերաբերյալ

Երբ մի քանի ամիս առաջ՝ դեկտեմբերի 5-ին, Lurer.com-ը, հղում կատարելով սեփական աղբյուրներին, հրապարակեց, որ Էրեբունի վարչական շրջանի շենքին հարակից գազալցակայանում, որը պատկանում ՀՀ ԱԺ պատգամավոր Մհեր Սեդրակյանին (Թոխմախի Մհեր), դաժան ծեծի են ենթարկվել Ստանիսլավսկու անվան ռուսական դրամատիկական թատրոնի դերասան Սերգեյ Գրիգորյանն ու նրա եղբայրը, ամբողջ լրատվական դաշտը ցնցվեց, մեկը մյուսի ետևից ԶԼՄ-ները սկսեցին անդրադառնալ հրապարակմանը: 

Հրապարակումից քիչ հետո Համալսարանական կլինիկական թիվ 1 հիվանդանոցում գտնվող ծեծված դերասանին այցելեց մեր նկարահանող խումբը, ինչի արդյունքում պարզեցինք, որ, ճիշտ է, դերասանի կյանքին վտանգ չի սպառնում, բայց նա մեծ դժվարությամբ է կարողանում լսել:

Չանցած երկու ժամ՝ հիվանդանոց եկավ Մհեր Սեդրակյանը՝ պարզելու, թե իրականում ինչ է կատարվել, քանի որ այդ ամենն իր անվան հետ էր կապված: Հերքեց տարածված լուրերը և հայտարարեց, որ ինքն այդ ամենից տեղեկություն չունի, և որ իր գազալցակայանում նման դեպք չի գրանցվել:

Այնուհետև մամուլը լցվեց հերքումներով և հանկարծակի լռեց:

Բայց, արի ու տես, դեպքի առթիվ Հայաստանում չտեսնված ու չլսված մի իրավիճակ սկսվեց. մամուլը լռեց, իսկ ոստիկանությունը՝ ոչ: 

Օրերս Lurer.com-ի խմբագրություն էր ծանուցվել մի նամակ՝ ստորագրված Վաղարշապատի քննչական բաժանմունքի պետ, ոստիկանության փոխգնդապետ Ս. Կ. Մարտիրոսյանի կողմից, որում ասված էր, մեջբերում ենք. «Վաղարշապատի քննչական բաժանմունքում Սերգեյ Հրանտի Գրիգորյանի մարմնական վնասվածք ստանալու վերաբերյալ նախապատրաստվող նյութերով ՀՀ քր. դատ. օր-ի 179 հոդվածի կարգով խնդրվում է տրամադրել Սերգեյ Գրիգորյանին և նրա եղբորը՝ Արտյոմ Գրիգորյանին ծեծի ենթարկելու փաստը հաստատող Ձեզ մոտ եղած նյութերը»,-մեջբերման ավարտը:

Փաստորեն, ի հեճուկս լրատվամիջոցների, որոնք հերքեցին ինֆորմացիան, հայտարարելով, թե դերասանն ընկել է, այդ իսկ պատճառով է հայտնվել հիվանդանոցում, դեռևս ոստիկանության քննչական բաժնում նյութեր են նախապատրաստվում:

Մնում է միայն հուսալ, որ այս և նմանատիպ դեպքերը (մենք մեր պատմության մեջ ևս մեկն ունենք) իսկապես կբացահայտվեն, և կպատժվեն իրական մեղավորները: 

Կարիք ենք համարում ոստիկանությանը տեղեկացնել, որ լրագրողներն ընդամենը բարձրաձայնում են առկա խնդրի մասին: Այնպես, որ գործի լիարժեք քննությունը թողնում ենք Ձեզ՝ հավատալով, որ այն լիարժեքորեն կբացահայտվի, և հասարակությունը կտեղեկացվի բացահայտված այլ մանրամասների մասին:

Նելլի Ավետիսյան