Աբովյանում հյուրանոցը հասարակաց տան են վերածել

Աբովյան քաղաքի բնակիչներ Շահեն Հարությունյանին և Լիլիթ Մարգարյանին դատախազությունը մեղադրանք է առաջադրել երկու կամ ավելի անձանց պոռնկությամբ զբաղվելուն նպաստելու համար: Այս մասին գրել է iravaban.net-ը:

Համաձայն այդ մեղադրանքի՝ Շահեն Հարությունյանը, հանդիսանալով անհատ ձեռնարկատեր, համապատասխան համաձայնագրի հիման վրա իր կողմից օգտագործվող՝ Աբովյան քաղաքում գտնվող ''Աբովյան-բար'' հյուրանոցային համալիրը 2010թ. ապրիլից մինչև 2012թ. հուլիս ամիսն ընկած ժամանակահատվածում մատուցողուհի Լիլիթ Մարգարյանի օժանդակությամբ պահել, ղեկավարել է երկու կամ ավելի անձանց՝ օգտագործելով պոռնկությամբ զբաղվելուն նպաստելու համար:

Լիլիթ Մարգարյանի հետ պայմանավորվածության համաձայն՝ հյուրանոցի այցելուների հաճախականությունն ապահովելու նպատակով, հանրային վերը նշված հաստատության առանձնասենյակները հաճախորդների հետ գումարի դիմաց սեռական հարաբերություն ունենալու համար նրա միջոցով տրամադրել է մարմնավաճառներ Հեղինեին, Լիանային, Համեստին, Նարինեին, Հերմինեին, Ամալյային, Գայանեին, Հայկանուշին և այլոց, որոնցից յուրաքանչյուր անգամ առանձնասենյակ տրամադրելու դիմաց գանձված 6.000-ական դրամից 1.000-ական դրամը՝ որպես աշխատավարձ, վճարել է Լիլիթ Մարգարյանին, իսկ մնացածը տնօրինել անձամբ:

Մեղադրանք է առաջադրվել, իսկ անհատ ձեռնարկատիրոջ և մատուցողուհու նկատմամբ խափանման միջոց է ընտրվել ստորագրությունը չհեռանալու մասին: