Վրեժ լուծելու նպատալով դանակով բազմաթիվ հարվածներ է հասցրել

Էրեբունի և Նուբարաշեն վարչական շրջանների ընդհանուր իրավասության դատարանը քննության է առել քրեական գործն ըստ մեղադրանքի Արթուր Գ.-ի: Այս մասին գրել է Iravaban.net-ը:

Վերջինիս մեղադրանք է առաջադրվել այն բանի համար, որ նա 03.06.2012 թ-ին Երևանի Նուբարաշեն 11-րդ փողոցի 6-րդ շենքի հարակից տարածքում գտնվող ավտոտնակների մոտ, վրեժ լուծելու նպատակով, Գուրգեն Մ.-ին կյանքից ապօրինաբար զրկելու դիտավորությամբ իր մոտ եղած դանակով բազմաթիվ հարվածներ է հասցրել վերջինիս կենսական կարևոր օրգանների շրջաններում, որի արդյունքում նրա առողջությանը պատճառվել է ծանր վնաս՝ կյանքին վտանգ սպառնացող:

Վերջինիս նկատմամբ խափանման միջոց է ընտրվել կալանավորում:

ՀՀ քրեական օրենսգրքի 34-104-րդ հոդվածի 1-ին մասով առաջադրված մեղադրանքում ամբաստանյալ Արտյոմ Գ.-ն իրեն մեղավոր է ճանաչել մասնակիորեն։ Ընդունելով գործով տուժող Գուրգեն Մ.-ին դանակահարելու և դիտավորությամբ ծանր մարմնական վնասվածք պատճառելու հանգամանքը՝ ամբաստանյալ Արտյոմ Գ.-ն հայտնել է, որ ինքը տուժող Գուրգեն Մ.-ի կյանքից զրկելու հանցավոր դիտավորություն չի ունեցել և նրան սպանել չի ցանկացել:

Դեպքի վայրի զննության արձանագրության և կից լուսանկարչական հավելվածի համաձայն՝ Երևան քաղաքի Նուբարաշեն 11 փողոցի 6 շենքին հարակից տարածքում թիվ 272 ավտոտնակի դարպասների վրայից և առջևի մասից հայտնաբերվել և վերցվել են արյան նմանվող հետքեր։

Դատարանը վճռել է ամբաստանյալ Արտյոմ Գ.-ն մեղավոր ճանաչել ՀՀ քրեական օրենսգրքի 34-104-րդ հոդվածի 1-ին մասով նախատեսված հանցանքի կատարման մեջ և նրա նկատմամբ քրեական պատիժ կիրառել՝ դատապարտել ազատազրկման 8 /ութ/ տարի ժամկետով, որը պետք է կրի ՀՀ ԱՆ համապատասխան քրեակատարողական հիմնարկում, պատժի կրման սկիզբը հաշվել 2012 թվականի հունիսի 04-ից: