Վարդան Սեդրակյանի տրամադրությունը շատ բարձր էր. առաջին նիստ (տեսանյութ)

Այսօր՝ մայիսի 14-ին, Կենտրոն և Նոր Նորք Մարաշ ընդհանուր իրավասության դատարանում դատավոր Գագիկ Պողոսյանի նախագահությամբ տեղի ունեցավ ՀՀ նախագահի թեկնածու Վարդան Սեդրակյանի գործով առաջին դատական նիստը:

Դատական նիստը հետաձգվեց, քանի որ ամբաստանյալ Խաչատուր Պողոսյանը հանրային պաշտպան խնդրեց։ 

Դատավոր Գ Պողոսյանի որոշմամբ հետաձգվեց գործի քննությունը, մինչև պաշտպանի ներգրավվումը: Հաջորդ նիստը տեղի կունենա սույն թվականի մայիսի 20-ին՝ ժամը 12-ին:

Նշենք, որ Վարդան Սեդրակյանի տրամադրությունը շատ բարձր էր, և նիստի ողջ ընթացքում նա ժպտում էր բոլորին։

Հիշեցնենք, որ ՀՀ ԱԱԾ քննչական վարչությունը Վարդան Սեդրակյանին մեղադրանք է առաջադրել Քրեական օրենսգրքի 34-38-305 հոդվածներով: ՀՀ քրեական օրենսգրքի համաձայն՝ 34-րդ հոդվածով սահմանվում է հանցափորձը (Հանցափորձ է համարվում ուղղակի դիտավորությամբ կատարված այն գործողությունը (անգործությունը), որն անմիջականորեն ուղղված է հանցանք կատարելուն, եթե հանցագործությունն ավարտին չի հասցվել անձի կամքից անկախ հանգամանքներով), 38-ով՝ հանցակիցների տեսակները և 305-ով՝ պետական, քաղաքական կամ հասարակական գործչի սպանությունը։

Վարդան Սեդրակյանին կալանավորել են մարտի 5-ին: Նա մեղադրվում է ԱԻՄ նախագահ Պարույր Հայրիկյանի դեմ մահափորձ պատվիրելու մեջ:

Լուսանկարը՝ Գագիկ Շամշյանի