Բազմաբնակարան շենքը հանձնվել է «Արցախ» բանկին՝ առանց բնակարանների սեփականատերերի գիտության

Ինչպես ավելի վաղ հայտնել էինք, Դավիթաշեն երկրորդ թաղամաս 46 շենք հասցեի հարեւանությամբ գտնվող բազմաբնակարան նորակառույց շենքը «Տոնուս» ՍՊԸ-ն որպես գրավ հանձնել էր «Արցախ» բանկին՝ սնանկ հայտարարվելու պատճառով: Շենքում բնակարան ձեռք բերած սեփականատերերը մինչ վերջին պահը չէին իմացել այդ մասին, այժմ էլ քայլեր են ձեռնարկում՝ տարիների քրտինքով ձեռք բերված բնակարանները ստանալու համար:

Shamshyan.com-ի հետ զրույցում սեփականատերերից Հայկ Մարջանյանը հայտնեց, որ այսօր 70 սեփականատեր ստորագրել է գրության տակ, որով ՀՀ նախագահից, կառավարությունից, վարչապետից պահանջում են հետեւողական լինել իրենց բնակարանային խնդրին: Հինգշաբթի ցույց կկազմակերպեն Կառավարության շենքի առջեւ: «Մենք մեր բնակարաններն ենք ուզում: 140 սեփականատերն էլ վճարել է բնակարանների գումարի մեծ մասը, բայց այսօրվա դրությամբ մեզ թույլ չեն տալիս անգամ մուտք գործել շենքի տարածք, դարպասներն էլ փակում են: Ասում են՝ շենքը գրավի տակ է եւ «Արցախ» բանկին է պատկանում:

Մենք չենք ուշացրել մուծումները եւ պարտաճանաչ կատարել ենք մեր պարտականությունները: «Տոնուսն» ասել է, որ բանկն էլ առաջարկում է մեկ քառակուսի մետրի համար ավելացնել 250 դոլար: Կենտրոնի գնե՞րն է սարքում: Ինչպե՞ս է բանկը շենքը որպես գրավ վերցրել առանց մեր համաձայնության: Բանկն ինչպե՞ս կարող էր տեղյակ չլինել, որ գույքը գրավի տակ է առնվել: Հանցավոր համաձայնության են եկե՞լ…»,-ասում է Հայկ Մարջանյանը: