Արմավիրի սոցապ ծառայության պետն ու տեղակալը տեղափոխվեցին Նուբարաշենի բանտ

Երեկ՝ մայիսի 14-ին, Երևանի Կենտրոն-Նորք Մարաշ վարչական շրջանների ընդհանուր իրավասության դատարանի դատավորներ Էդիկ Ավետիսյանն ու Մնացական Մարտիրոսյանը բավարարել են Ոստիկանության Քննչական գլխավոր վարչության Հատկապես կարևոր գործերով քննության վարչության ավագ քննիչի միջնորդությունը և որպես խափանման միջոց 2-ամսա կալանքի որոշում են կայացրել ՀՀ Աշխատանքի և սոցիալական հարցերի նախարարության Սոցիալական ապահովության պետական ծառայության Արմավիրի բաժնի պետ՝ 52-ամյա Սեյրան Կարապետյանի և նրա տեղակալ 58-ամյա Հերիքնազ Ասատրյանի նկատմամբ:

Ինչպես հայտնում է shamshyan.com-ը, Ոստիկանության քննչական գլխավոր վարչությունում քննվող քրեական գործի շրջանակներում պարզվել է, որ նշված անձինք 2008-2010 թվականների ընթացքում, չարաշահելով իրենց պաշտոնական լիազորությունները, յուրացրել են 450.016.000 դրամի էական գույքային վնաս: Ֆոտոլրագրողը հայտնում է, որ հանցագործությունը բացահայտվել է Ոստիկանության քննչական գլխավոր վարչության ՀԿԳ քննության վարչության և Ոստիկանության կազմակերպված հանցավորության դեմ պայքարի գլխավոր վարչության 1-ին վարչության աշխատակիցների կողմից ձեռնարկված օպերատիվ-հետախուզական գործողությունների շնորհիվ:

Սոցիալական ապահովության պետական ծառայության Արմավիրի տարածքային բաժնի պետ Ս. Կարապետյանն ու նրա տեղակալ Հ. Ասատրյանը տեղափոխվել են Նուբարաշեն քրեակատարողական հիմնարկ: Ֆոտոլրագրողը հայտնում է, որ առաջիկայում հնարավոր է ևս այլ պաշտոնատար անձինք կալանավորվեն, ովքեր աշխատում են ՀՀ Աշխատանքի և սոցիալական հարցերի նախարարության սոցիալական ապահավության պետական ծառայությունում և նրա ստորաբաժանումներում, ովքեր անձնական շահագրգռվածությունից ելնելով չարաշահել են իրենց պաշտոնական լիազորությունները և պետությանը պատճառել խոշոր չափի վնաս: