Մեղադրվում է խարդախության մեջ

Դատավարական ղեկավարում իրականացնող դատախազը հաստատել է կաշառք տալու պատրվակով Մ. Թովմասյանի կողմից ուրիշի գույքը խարդախության եղանակով հափշտակելու դեպքի առթիվ հարուցված քրեական գործով մեղադրական եզրակացությունը:

Մինչդատական վարույթում ձեռք բերված փաստական տվյալների համաձայն՝ Է. Քոչարյանին փաստացի պատկանող վրացական պետհամարանիշով Մերսեդես մակնիշի ավտոմեքենայի՝ գողացված լինելու վերաբերյալ իբր ոստիկանությունում առկա գործին ընթացք չտալու համար ոստիկանին կաշառք տալու պատճառաբանությամբ Մ. Թովմասյանը Է. Քոչարյանից պահանջել է խոշոր չափի գումար:

Նախաքննության տվյալներով՝ ոչ մի տեղ չաշխատող Մ.Թովմասյանը 2012թ. նոյեմբերի 29-ին և դեկտեմբերի 5-ին նրանից համապատասխանաբար ստացել է 2000 ԱՄՆ դոլար և 600 000 ՀՀ դրամ գումար:

ՀՀ կառավարությանն առընթեր ոստիկանության քննչական գլխավոր վարչության ՀԿԳ քննության վարչությունում հարուցված քրեական գործով ձեռք բերված ապացույցների հիման վրա Մ. Թովմասյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով: Քրեական գործը մեղադրական եզրակացությամբ ուղարկվել է Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան: