Հրանտ Մաթևոսյանի եղբոր որդու սպանությունը բացահայտվել է. վկաները պնդել են՝ անտառապետն է սպանել

Ոստիկանության քննչական գլխավոր վարչության Լոռու մարզի քննչական բաժնի հատկապես կարևորագույն գործերով ավագ քննիչ Վաղինակ Մկրտչյանը դիմել է Լոռու մարզի ընդհանուր իրավասության դատարան և դատարանից խնդրել, որպեսզի դատարանը՝ որպես խափանման միջոց, կալանավորման որոշում կայացնի Վանաձոր քաղաքի բնակիչ Տիգրան Մելիքյանի նկատմամբ, ով ՀՀ Բնապահպանության նախարարության բնապահպանության պահպանության տեսուչ է։

Ինչպես հայտնում է shamshyan.com-ը, դատարանը բավարարել է ավագ քննիչի միջնորդությունը, իսկ ոստիկանությունն էլ նրա նկատմամբ հայտարարել է հետախուզում։

Քննչական բաժինը ձեռք է բերել հիմնավոր ապացույցներ, որ նա մայիսի 15-ին՝ ժամը 22։00-ի սահմաններում, Վանաձոր քաղաքի Բաղրամյան փողոցի վրա գտնվող «Գանձակ» սուպերմարկետի մոտ մի խումբ անձանց ներկայությամբ վիճաբանության մեջ է մտել Լոռու մարզի Ահնիձոր գյուղի բնակիչ, 35-ամյա Թովմա Մաթևոսյանի հետ, այնուհետև սուր կտրող-ծակող առարկայով հարվածել է Թ. Մաթևոսյանի կրծքավանդակի ձախ մասին։ Վիրավորը տեղափոխվել էր Վանաձորի հիվանդանոց, որտեղ մահացել էր։

Սպանված Թ. Մաթևոսյանը աշխատում էր Մոտկորի անտառապետ և հայ մեծանուն գրող Հրանտ Մաթևոսյանի եղբոր որդին էր, ով ուներ 2 անչափահաս երեխա։

Այս օրերին սպանությունը կատարած ու փախուստի դիմած հանցագործի մտերիմներն ու ընկերները սուտ տեղեկություններ են տարածում, թե իբրև Թ. Մաթևոսյանն է դանակով հարվածել իր սրտին, սակայն մոռանում են, որ ոստիկանությունը դեպքի ականատես անձանցից արդեն ցուցմունքներ է վերցրել, ովքեր հայտնել են, որ Թ. Մաթևոսյանին նա հարվածել է սպանելու նպատակով, և եթե Տ. Մելիքյանը հայտնաբերվի, ապա նրանք այդ ամենը կհայտնեն առերեսման ժամանակ։

Տ. Մելիքյանը հայտնաբերվելու դեպքում տեղափոխվելու է ՀՀ Արդարադատության նախարարության «Վանաձոր» քրեակատարողական հիմնարկ, քանի որ դատարանը, ծանոթանալով ավագ քննիչի միջնորդությանը, այն համարել է հիմնավորված և խափանման միջոց է ընտրել կալանավորումը։