«Եկել եմ, հարցեր տվեք». Ռուբեն Հայրապետյանը՝ «Հարսնաքարի» գործով դատավարությանը (տեսանյութ)

Ռուբեն Հայրապետյանն ամեն ինչ կտար, որ հունիսի 17-ին ներկա լիներ իրենց ընտանեկան «Հարսնաքար» ռեստորանում,երբ ծեծի հետեւանքով մահացավ ռազմական բժիշկ Վահե Ավետյանը։

«Եթե ես այնտեղ լինեի, նման բան չէր լինի։ Նրանք գիտեն, որ ես չեմ սիրում ցինիկություն»,-այսօր Երեւանի Ավան եւ Նոր նորք վարչական շրջանների ընդհանուր իրավասության դատարանում հայտարարեց Ռուբեն Հայրապետյանը։

Այսօր պարոն Հայրապետյանն ինքնակամ էր ներկայացել դատարան՝ իր նախաձեռնությամբ ցուցմունք տալու՝ ռազմական բժիշկ Վահե Ավետյանին եւ նրա ընկերներին դաժան ծեծի ենթարկելու առիթով հարուցված քրեկան գործով: Ծեծի արդյունքում Վահե Ավետյանը գիտակցության չգալով մահացավ;

«Անընդհատ շահարկվում էր, որ ես վախենում եմ դատարանից, դրա համար ներկայացել եմ, եթե կան հարցեր, հարգելի դատարան, խնդրում եմ տվեք»,-ասաց Ռուբեն Հայրապետյանը։

Նա նաև նշեց, որ դեպքի մասին իրեն տեղեկացրել են հեռախոսով եւ ասել վիճաբանությունից հետո Վահե Ավետյանը եւ նրա ընկերները իրենց ոտքով դուրս են եկել ռեստորանային համալիրից։ Ու ինքը չի գնացել ռեստորան։

Նրա խոսքերով, երբ իմացել է, որ Վահե Ավետյանին վիրահատում են՝ բարկացել է ռեստորանի անվտանգության աշխատակիցների վրա։ Սակայն չի պարզել դեպքի մանրամասները եւ ով ում է հարվածել. «Ես իրենց ուղղակի վիրավորել եմ, կա հարց, շատ վատ պատմություն եւ սկսվեց քաղաքական շոու կազմակերպել։ Ես վրդովված միայն իրենց անպատվել եմ».-հայտարարեց ՀՀԿ նախկին պատգամավորը։

Նա միայն ասաց, որ պարզել է, որ ամբաստանյալ Արման Խաչատրյանը դեպքի ժամանակ նստած է եղել ավտոմեքենայի մեջ, քանի որ իրեն վատ է զգացել։ Նաեւ միջադեպին մասնակցել են այլ անձինք, որոնց ինքնությունը չի կարողացել պարզել։

Ռուբեն Հայրապետյանը դատարանին խնդրեց հիմք ընդունել նախաքննության ընթացքում տված ցուցմունքները։

Այսօր Ռուբեն Հայրապետյանը նաեւ նշեց, որ ամբաստանյալներին ճանաչում է դեռ մանկուց եւ նրանք նման բան չէին կարող անել։

Պարոն Հայրապետյանը դատարանին վստահեցրեց, որ 6 ամբաստանյալներից եւ ոչ մեկը չի եղել իր թիկնապահը' միայն անհրաժեշտության դեպքում ուղեկցել են իրեն։

Ի դեպ, այսօր դատական նիստից առաջ Ռուբեն Հայրապետյանը հրաժարվեց խոսել լրագրողների հետ։

Հոդվածը՝ A1plus-ի:

Մանրամասները՝ տեսանյութում.