Ինչ է զգում բրիտանացի զինվորի կինը, ով հեռուստացույցով է տեսել` ինչպես են սպանել իր ամուսնուն

Մեծ Բրիտանիայում իսլամիստների կողմից սպանված զինվորի կինը՝ Ռեբեկա Ռայբին, Bild գերմանական պարբերականին պատմել է իր կրած սարսափների մասին. «Երբ նա 2009-ին ծառայում էր Աֆղանստանում, ես տագնապում էի նրա կյանքի համար: Երբ նա վերադարձավ ԱՆգլիա, ես դադարեցի վախենալ»,-ասում է զինվորի այրին:

Այդ վախը նա վերապրեց միայն անցյալ չորեքշաբթի օրը, երբ միացնելով հեռուստացույցը՝ տեսավ, թե ինչպես են 2 ահաբեկիչները զինվոր սպանել Լոնդոնի կենտրոնում: Այդ զինվորը նրա ամուսինն էր:

Ինչպես է հաղթահարում ցավը մի կին, ով հեռուստացույցով է տեսել, թե ինչպես է սպանվել իր ամուսինը: «Դա հեշտ չէ հաղթահարել, այդ ցավը հեշտ չէ կրել,-ասում է Ռեբեկան արցունքների միջից,-հնարավոր չէ պատկերացնել, որ նման բան կարող է  պատահել Անգլիայում: Նա հիանալի հայր էր Ջեքի համար: Մենք շատ կկարոտենք նրան: Ես սիրում եմ և միշտ կսիրեմ նրան»,-մեջբերում է պարբերականը կնոջ խոսքերը:

Ոստիկանության տվյալներով՝ ահաբեկիչները հարձակվել էին զինվորի վրա, հարվածել մեքենայով, ապա սպանել նրան:

Հիշեցնենք, որ չորեքշաբթի օրը Բրիտանիայի մայրաքաղաք Լոնդոնի Վուլիչի շրջանում 2 իսլամիստների կողմից բրիտանացի զինծառայողի սպանությունից հետո բախումներ էին տեղի ունեցել ոստիկանների և «Անգլիայի պաշտպանության լիգա» կազմակերպության ակտիվիստների միջև:

Ակտիվիստները ազգայնական երգեր էին երգում, ռասիստական լոզունգներ էին վանկարկում և բողոքում ներգաղթյալների ու իսլամի տարածման դեմ: Ոստիկանները փորձել են ակտիվիստներին օղակի մեջ առնել, սակայն բողոքողները դիմադրություն են ցույց տվել, որից հետո ոստիկանությունը դիմել էր մահակների օգնությանը: