Տուժողը՝ ամբաստանյալի աթոռին

Արարատի և Վայոց Ձորի մարզի դատարանում՝ դատավոր Ռուբիկ Մխիթարյանի նախագահությամբ, քննվում է քրեական գործ՝ տուժողի կողմից սուտ ցուցմունք տալու մեղադրանքով:

Այսպես, ըստ մեղադրանքի, Սարգիս Տիտանյանը ՀՀ Արարատի և Վայոց Ձորի մարզերի ընդհանուր իրավասության դատարանի վարույթում քննված քրեական գործի դատաքննության ընթացքում որպես տուժող նախազգուշացված լինելով սուտ ցուցմունք տալու դեպքում քրեական պատասխանատվության մասին, սուտ ցուցմունք է տվել: Գործի տվյալներով, սուտ ցուցմունքը տրվել է նույն գործով ամբաստանյալներ, համածառայակիցներ Գոռ Թովմասյանին ու Սասուն Նիկոլյանին ՀՀ քրեական օրենսգրքի 358-րդ հոդվածի 2-րդ մասի 1-ին կետով՝ մի խումբ անձանց կողմից պետի նկատմամբ բռնի գործողություններ կատարելը, առաջադրված մեղադրանքների առնչությամբ: Ցուցմունքը կարևոր նշանակություն կարող էր ունենալ նշված մեղադրանքի ապացուցման հարցում՝ ըստ ցուցմունքի, տուժողը հայտնել էր, որ իր և նշված ամբաստանյալների միջև 2011թ. օգոստոսի 13-ին ժամը 18:00-ի սահմաններում զորամասի հսկիչ-անցագրային կետի դիմաց տեղի ունեցած միջադեպի ժամանակ իրեն հարվածել և մարմնական վնասվածք է պատճառել Գ.Թովմասյանը, իսկ Նիկոլյանի և Ազիզյանի կողմից համապատասխանաբար իր նկատմամբ բռնություն գործադրելու և դրա համար նպաստավոր պայմաններ ստեղծելու հետ կապված որևէ հստակ գործողություններ կատարելու վերաբերյալ տեղեկություն չի հայտնել և չի հաստատել վերջիններիս կողմից միջադեպի ընթացքում իրեն հարվածելու հանգամանքները:

Մինչդեռ նույն քրեական գործով 2012թ. օգոստոսի 16-ին կայացված և 2012թ դեկտեմբերի 27-ին օրինական ուժի մեջ մտած դատավճռով ապացուցված և հաստատված հանգամանք է համարվել այն, որ միջադեպի ընթացքում տուժող Ս.Տիտանյանին ծեծի են ենթարկել գործով ամբաստանյալներ Գ.Թովմասյանը և Ս.Նիկոլյանը, իսկ Է.Ազիզյանը իր գործողություններով օժանդակել ու նպաստավոր պայմաններ է ստեղծել' վերջիններիս կողմից տուժող Տիտանյանին ծեծի ենթարկելու հարցում, ինչի հանգամանքները տուժող Տիտանյանը հաստատել է դեռևս նույն քրեական գործի նախաքննության ընթացքում տված գրավոր հաղորդմամբ և որպես տուժող տված տեղեկություններով:

Տուժողին մեղադրանք է առաջադրվել ՀՀ քրեական օրենսգրքի 338-րդ հոդվածի երկրորդ մասի առաջին կետով՝ ծանր կամ առանձնապես ծանր հանցագործության մեջ մեղադրանքի առնչությամբ սուտ ցուցմունք:

Հեղինակ՝ «ՓԱՍՏԻՆՖՈ»