Ռուսաստանն ու ԱՄՆ-ն ուշացել են Սիրիան փրկելու հարցում. Telegraph

Լոնդոնի քաղաքապետ Բորիս Ջոնսոնը The Daily Telegraph բրիտանական պարբերականում հրապարակվել է հոդված, որում անդրադարձ է կատարել Սիրիան փրկելու Մոսկվայի և Վաշինգտոնի ջանքերին: «Սիրիան փրկելու հարցում առաջատար համաշխարհային գերտերությունները ուշացել են: Այս հակամարտությունը այլևս ոչ մի կերպ հաղթել հնարավոր չէ: Ապստամբներին զինելը իսկական խելագարություն կլինի, քանի որ այն, ինչ տեղի է ունենում Սիրիայում, վերածվել է դաժան կրոնական պատերազմի: Ժամանակն է ամբողջովին դադարեցնել պատերազմը այդ խելահեղությանը վերջ դնելու համար», - կարծում է քաղաքական գործիչը:

Նրա կարծիքով՝ ժամանակն է, որ ԱՄՆ-ն, Ռուսաստանը, Եվրամիությունը, Թուրքիան, Իրանը, Սաուդյան Արաբիան և այս խաղի այլ խաղացողները միջկառավարական խորհրդակցություն գումարեն Սիրիայի արյունահեղությունը դադարեցնելու նպատակով: Լոնդոնի քաղաքապետը վստահ է, որ Սիրիան չի կարելի օգտագործել աշխարհաքաղաքական միավորներ կուտակելու կամ ուժ ցուցադրելու համար: «Մենք խաղաղության չենք հասնի, եթե զենքը փոխանցենք մոլագարների ձեռքը», - եզրափակել է քաղաքապետը:

Իր հերթին բրիտանական մեկ այլ պարբերական`The Guardian-ը, գրում է, որ G8 գագաթնաժողովում դիվանագիտական առաջընթաց չի գրանցվի: Պարբերականը նման եզրակացության է եկել ռուս նախագահ Պուտինի կողմից արված հայտարարությունից հետո, որում նա նշել էր, թե «սիրիացի ապստամբները մարդկային օրգաններ են ուտում»:

Բրիտանիայի վարչապետ Դևիդ Քեմերոնը հայտարարել էր, որ ռուսական և բրիտանական կողմը համաձայնության են եկել Սիրիայում աղետալի վիճակին վերջ դնելու անհրաժեշտության հարցում: Սակայն, ինչպես գրում է The Times-ը, դժվար թե առաջընթաց գրանցվի Ժնևում խաղաղության մասին վեհաժողովի անցկացման սկզբունքների հարցում: