Եթե Սիրիայում կոնֆլիկտը չհարթվի, այն կծավալվի դեպի հարևան երկրներ. Բաշար Ասադ

Սիրիայի նախագահ Բաշար Ասադը գերմանական Frankfurter Allgemeine Zeitung պարբերականին տված բացառիկ հարցազրույցում անդրադարձ է կատարել սիրիական հակամարտության կարգավորման համար Ժնևում կայանալիք խաղաղ բանակցային գործընթացին և նշել, որ Ժնևում շատ բան կախված է լինելու նրանից, թե «կդադարեցվի արդյոք դեպի Սիրիա ահաբեկիչների և զենքի մատակարարումը»:

«Եթե Ժնևում հաջողվի վերջ դնել մաքսանենգ ճանապարհով Սիրիային զենք մատակարարելուն և գրոհայինների ներս թափանցելուն, ապա դա հաջող սկիզբ կլինի հակամարտության խաղաղ կարգավորման համար և կհանգեցնի լարվածության թուլացմանը»,-ասել է Ասադը և հավելել, որ եթե Սիրիայի կոնֆլիկտը չլուծվի, այն կտարածվի դեպի հարևան պետություններ, ինչն էլ իր հերթին կապակայունացնի իրավիճակը ողջ տարածաշրջանում:

Նախագահի խոսքերով` Սիրիայի արաբական հանրապետությունը ճանաչում է միայն այն ընդդիմությունը, որը իր ձեռքը զենք չի վերցնում և կապ չունի ահաբեկչության հետ: «Ընդդիմութունը պետք է քաղաքական ծրագիր և ազգային հենարան ունենա, որը նա կարող է հաստատել՝ մասնակցելով խորհրդարանական և տեղական ինքնակառավարման ընտրություններին: Այս պահին սիրիական կառավարության կազմում կան ընդդիմության ներկայացուցիչեր, ովքեր մանդատներ ունեն Ազգային ժողովում»,-ասել է նախագահը:

Անդրադառնալով իր պաշտոնը լքելու Արևմուտքի պահանջներին` Ասադը հայտարարել է, որ այս պահին նման քայլն իր որակում է որպես ազգային դավաճանություն: