Ջենիֆեր Լոպեսը կնկարահանվի չիլիացի հանքափորների մասին պատմող «33» ֆիլմում

Հոլիվուդյան դերասանուհի և երգչուհի Ջենիֆեր Լոպեսը կնկարահանվի չիլիացի հանքափորների մասին պատմող «33» ֆիլմում, ովքեր հանքահորի փլուզումից հետո 2 ամիս ապրել էին փլատակների տակ. գրում է The Hollywood Reporter-ը:

Նկարահանումների մեկնարկի ամսաթիվը հայտնի չէ: Մեկ ամիս առաջ պարզ էր դարձել, որ գլխավոր հերոսի կերպարը ֆիլմում կկերտի Անտոնիո Բանդերասը: Նա խաղալու է Մարիո Սեպուլվեդո անունով հանքափորի դերը, ում կնքել էին Սուպեր Մարիո մականունով: Վերջինս տեսագրելու միջոցով փլատակների տակ հայտնված հանքափորների կյանքի օրագիրն էր կազմում և փոխանցում փրկարարներին:

Ֆիլմի ռեժիսորն է լինելու «Girl in Progress» ֆիլմը նկարահանած Պատրիսիա Ռիգենը:

Չիլիական անապատում գտնվող հանքավայրում փլուզումը տեղի էր ունեցել 2010-ին: 33 հանքափոր փակված էր մնացել 700մ խորության վրա: Նրանց ճակատագրի մասին երկար ժամանակ ոչինչ հնարավոր չէր լինում պարզել: Միայն դեպքից 2 շաբաթ անց փրկարարները հայտնաբերեցին այն վայրը, որտեղ տեղի էր ունեցել փլուզումը: Հանքափորները հողի տակ անցկացրել էին 69 օր: