Պետբյուջե է փոխանցվել 2 մլն 608 հազար դրամ, վերացվել 47 մլն 158 հազար դրամի անորակ աշխատանքներ. ՎՊ

Այսօր ՀՀ Ջրային տնտեսության պետական կոմիտեի նախագահ Անդրանիկ Անդրեասյանը, խոսելով 2012 թ. ՎՊ հաշվետվության մասին, հայտարարել է. «Ես համաձայն չեմ Վերահսկիչ պալատի ֆինանսական գնահատականին. ես համամիտ կլինեմ, եթե ջրանցքների անորակ աշխատանքը մետրով գնահատեն, ոչ թե ֆինանսական գնահատական տան: Ճիշտ մոտեցում չէ դա»:

Վերոհիշյալի կապակցությամբ ՀՀ ՎՊ լրատվական ծառայությունը տեղեկացնում է.

«ՀՀ Ջրային տնտեսության պետական կոմիտեի «Ջրային տնտեսության զարգացման և բարեփոխումների ԾԻԳ» պետական հիմնարկում ՀՀ ՎՊ կողմից իրականացված Արմավիրի և Թալինի մայր ջրանցքների բետոնացման աշխատանքների ստուգումների ընթացքում հայտնաբերվել է 2 մլն 608.75 հազար դրամ ծավալային հավելագրում և 47 մլն 158.19 հազար դրամի անորակ աշխատանք:

Նշենք, որ ստուգումների արդյունքում կազմված բոլոր արձանագրությունները ստորագրվել են վերահսկվող օբյեկտի պատասխանատուների կողմից և որևէ առարկություն չի ներկայացվել:

Ջրային տնտեսության պետական կոմիտեի նախագահ Անդրանիկ Անդրեասյանը՝ ՎՊ նախագահ Ի. Զաքարյանին ուղղված 10.04.2013 թվականի, 01/06/617-13 գրությամբ տեղեկացնում է, որ 2 մլն 608 հազար դրամի չափով գումարը կվերականգնվի մինչև 2013 թ. ապրիլի 20-ը, իսկ ջրանցքի շեպերում առկա ճաքերն արդեն վերացված են և համապատասխան ակտեր են կազմված:

Ավելին, ի կատարումն ՀՀ վարչապետի 2013 թ. մայիսի 20-ի 02/23.6/6877-13 և 2013 թ. մայիսի 22-ի 02/23.6/7047-13 հանձնարարականների Ա. Անդրեասյանը ներկայացրել է, որ «Արարատշին» ԲԲԸ-ի և «Սահակյանշին» ՓԲԸ-ի կողմից 2 մլն 608.75 հազար դրամը փոխանցվել է պետական բյուջե, իսկ 47 մլն 158.19 հազար դրամի անորակ աշխատանքները վերացված են և ԾԻԳ-ի համապատասխան հանձնաժողովն արձանագրել է այդ անորակ աշխատանքի վերացումը:

ՀՀ ՎՊ լրատվական ծառայություն