Հանցակազմի բացակայություն՝ Զոհրաբ Զոհրաբյանի հետ պատահած խոշոր ավտոպատահարում

Ազգային ժողովի նախկին պատգամավոր, «Բարգավաճ Հայաստան» կուսակցության անդամ Զոհրաբ Զոհրաբյանի՝ ապրիլի 5-ին խոշոր վթարի ենթարկվելու դեպքի առթիվ հարուցված քրեական գործը կարճվել է: Այս մասին Lurer.com-ի թղթակցի հետ զրույցում ասաց Զոհրաբյանի մամուլի քարտուղար Նաիրա Հարությունյանը:

Խոսնակի տեղեկացմամբ գործը՝ կարճվել է Քրեական դատավարության օրենսգրքի 35-րդ հոդվածի 1-ին մասի 2-րդ կետի հատկանիշներով՝ հանցակազմի բացակայություն:

«Առողջական վիճակն այժմ լավ է, չնայած անրակի հատվածում դեռևս մեկ վիրահատության անհրաժեշտություն կա: Այս պահին հստակ որոշված չէ, թե երբ կլինի վիրահատությունը, քանի որ բժիշկներն ասել են, որ դեղորայքային կոմա ստացած մարդու համար նման վիրահատություն կատարելը մի քիչ ժամանակ է պահանջում»,- ասաց Նաիրա Հարությունյանը՝ խոսելով Զոհրաբ Զոհրաբյանի առողջական վիճակի մասին:

Հիշեցնենք, որ Հրաչյա Քոչար փողոցի՝ դեպի Արաբկիր վարչական շրջանի շենք տանող հատվածում (բենզալցակայանի մոտ), անհայտ մեքենան հարվածել էր ԱԺ նախկին պատգամավոր Զոհրաբ Զոհրաբյանի Սուզուկի մակնիշի մեքենային։ Զոհրաբ Զոհրաբյանը եղել էր իր վարորդի հետ։ Նրանց անգիտակից վիճակում տեղափոխել էին Արմենիա բ/կ։