ԱՄՆ-ի Կոնգրեսը վետո է դրել սիրիացի ապստամբներին զենք մատակարարելու որոշման վրա

ԱՄՆ-ի Սենատի և ներկայացուցիչների պալատի հետախուզական հարցերով կոմիտեի անդամները դեմ են քվեարկել սիրիացի ապստամբներին զենք մատակարարելու որոշմանը. գրում է The Hill-ը` հղում կատարելով կոմիտեին:

Օրենսդիրները քվեարկել են սիրիացի ապստամբների ֆինանսական օգնության խիստ սահմանափակումների օգտին: Նման որոշման համար պատճառ են հանդիսացել այն տագնապները, թե զենքը կարող է հայտնվել ահաբեկչական խմբավորումների, որոնց թվում նաև՝ «Ալ Քաիդայի»  ձեռքում:

Կոմիտեի անդամների կարծիքով` ԱՄՆ-ի նախագահի աշխատակազմի պլանը կշռադատված և գործունակ չէ, քանի որ չի դիտարկում Սիրիայի ապստամբներին մատակարարվող զենքի նկատմամբ վերահսկողություն պահպանելու հնարավորությունը: 

Աշխատակազմի անդամները իրենց հերթին նշել են, որ օրենսդիրները կապում են իրենց ձեռքերը ապստամբներին զինելու հարցում` դրա դիմաց չառաջարկելով որևէ այլընտրանք:

Նշենք, որ հունիսի 14-ին Օբամայի աշխատակազմը որոշում էր կայացրել սիրիացի ապստամբներին հրազենային զենք  և հակատանկային համակարգեր ու սպառազինություններ մատակարարելու մասին: