Մոսկվայի կենտրոնում ինկասացիայի աշխատակիցներից 320 հազար դոլար են խլել

Մոսկվայի կենտրոնում հարձակում է իրականացվել գումար տեղափոխող ինկասատորների վրա, որի արդյունքում նրանցից մեկը վիրավորվել է։ Հանցագործների ավարը կազմել է 320 հազար ԱՄՆ դոլար, այդ մասին հայտնում է «РИА Новости» լրատվական գործակալությունը՝ հղում անելով իրավապահ մարմիններին։

Հարձակումն իրագործվել է փետրվարի 3–ին՝ ժամը 16։00–ի շրջակայքում, Մակարենկո փողոցում։ Կողոպտիչները երեքն են եղել։ Նրանք խլել են փողերով լի պայուսակը և դիմել փախուստի «Toyota» կամ «Lexus» ավտոմեքենայով։

Մակարենկո փողոցում է տեղակայված դաղստանյան «Эсидбанк»-ի միակ մոսկովյան գրասենյակը։ Դեռ հայտնի չէ՝ կապվա՞ծ է արդյոք կողոպուտն այդ հաստատության հետ, թե՞ ոչ։ Հարձակումն իրականացվել է հենց այն պահին, երբ փողերը մեքենայից տեղափոխվում էին «Эсидбанк»–ի գրասենյակ։