Ռուսաստանում «նարնջագույն» հեղափոխություն չստացվեց

Ռուսաստանի մայրաքաղաք Մոսկվայի «Պոկլոննի» բլրի հանրահավաքի մասնակիցները սկսել են հեռանալ տարածքից։ Ցույցի ընթացքում տասնյակ ցուցարարներ դիմել են առաջին բուժօգնության, որոնցից մեծ մասի մոտ եղել են ցրտահարության նշաններ, հաղորդում է Интерфакс-ը։ 

«Մենք տարբեր վերաբերմունք ունենք Վլադիմիր Պուտինի հանդեպ։ Ոմանք համակրում են նրան, ոմանք չեն համակրում, բայց մենք նրան թույլ չենք տա ոչնչացնել մեր երկիրը», – հայտարարել է հանրահավաքի կազմակերպիչներից Մակսիմ Շեվչենկոն։ 

Իր հերթին հեռուստահաղորդավար Միխայիլ Լեոնտևը հայտարարել է. «Մեզ անհրաժեշտ է վերակառուցում։ Միխայիլ Գորբաչովին պետք է, որպեսզի Պուտինը հեռանա իշխանությունից և դրա համար Պուտինի դեմ հայտարարություններով է հանդես գալիս։ «Բոլոտնի» հրապարակում հավաքվածները Պուտինի հրաժարականը չեն ցանկանում, այլ ցանկանում են իշխանության հրաժարականը»։

«Սկզբում նրանք պայքարում էին արդար ընտրությունների անցկացման համար, իսկ հիմա նրանք հակասահմանադրական հեղաշրջման կոչ են անում։ Մենք նրանց թույլ չենք տա ապակայունացնել Ռուսաստանը», – հայտարարել է քաղաքագետ, հասարակական գործիչ Սերգեյ Կուղինյանը։ 

Հանրահավաքն անցկացվել է «Ո՛չ Ռուսաստանի ապակայունացմանը», «Նարնջագույն հեղափոխություն չի ստացվի» կարգախոսներով։

«Ռուսաստանի ապագայի համար» հանրահավաքի կազմակերպիչները կոչ են արել իրենց միանալ այն քաղաքացիներին և ուժերին, որոնք դեմ են գունավար հեղափոխությունների սցենարների իրականացմանը, հաղորդում է Вести.ru–ն։

Ինչպես հաղորդում է BBC Russian–ը, ոստիկանությունը մտադիր է տուգանել Պոկլոննի բլուրում անցկացված հանրահավաքի կազմակերպիչներին, որոնք քաղաքային իշխանություններին իրազեկել էին 15 հազարանոց հանրահավաք անցկացնելու մասին, սակայն ոստիկանության տվյալներով՝ ցույցին մասնակցել է 100 հազ. մարդ։ Հանարահավաքի կազմակերպիչների հիմնական նպատակը գործող վարչապետ, նախագահի թեկնածու Վլադիմիր Պուտինին աջակցելն էր։ Նմանատիպ ակցիաներ են անցակցվել Չելյաբինսկում, Պետրոպավլովսկում, Կամչատկայում և ՌԴ այլ քաղաքներում։   

Նշենք, որ այսօր Ռուսաստանի մայրաքաղաքում և այլ խոշոր քաղաքներում միաժամանակ  տեղի են ունեցել «Արդար ընտրությունների համար» ընդդիմադիր ուժերի կազմակերպած բողոքի ցույցերը և նախագահի թեկնածու Վլադիմիր Պուտինին աջակցող ուժերի հանրահավաքը։