Եղբայրներին պաշտպանեցին իշխող կուսակցության պատգամավորից

Դատարանն անմեղ է ճանաչել երկու եղբայրներին, որոնց ծեծի էր ենթարկել «Միասնական Ռուսաստան» կուսակցության անդամ, ՌԴ պետդումայի պատգամավոր, նախկին բռնցքամարտիկ Իգոր Արոնսոնն՝ իր որդու հետ միասին, իսկ այնուհետև մեղադրել նրանց՝ իրենց վրա հարձակում գործելու մեջ։ Այժմ քրգործ է հարուցվել արդեն պատգամավորի նկատմամբ, որի պատճառը փողոցում տեղադրված տեսախցիկի կատարած տեսագրությունն է եղել, որտեղ հստակ երևում են դաժան բռնության մանրամասները։
Հիշեցնենք, որ միջադեպը տեղի էր ունեցել 2011 թ. հոկտեմբերի 25-ին։ Երբ պատգամավորն ու իր որդին իրենց մեքենայով ընթանալիս են եղել Ուվարովկա գյուղի ճանապարհով, ճանապարհը փորձել է անցնել 25-ամյա Անդրեյ Զորինը, ում ճանապարհի մյուս կողմում սպասելիս է եղել եղբայրը՝ 22-ամյա Անտոնը։ Սա դուր չի եկել Արոնսոնին։ Պատգամավորն իր որդու հետ միասին կարճ խոսակցություն են ունեցել եղբայրների հետ, որի ավարտին սկսել են հարվածներ հասցնել եղբայրներին։ Ծեծը շարունակվել է նույնիսկ այն ժամանակ, երբ 2 եղբայրներն արդեն անօգնական վիճակում ընկած են եղել մայթեզրին։
Միջադեպից հետո երկու կողմն էլ դիմել է ոստիկանություն։ Պատգամավորի դիմումի հիման վրա հարուցված քրեական գործը վարող դատավորը, սակայն, հակասություն է արձանագրել Արոնսոնի օգտին տրվող վկայություններում, քանի որ վկաները պնդում էին, որ եղբայրները հարձակվել են Արոնսոնի վրա, սակայն նրա մոտ մարմնական վնասվածքներ չեն հայտնաբերվել։ Եղբայրների դեմ հարուցված քրեական գործը կասեցվել է, դատարանը նրանց անմեղ է ճանաչել։ Աղբյուրը՝ gazeta.ru։