Պուտինը սպառել է իրեն. Գորբաչով

Նախկին ԽՍՀՄ նախագահ Միխայիլ Գորբաչովի կարծիքով՝ Ռուսաստանի գործող վարչապետ և նախագահի թեկնածու Վլադիմիր Պուտինը շատ լավ գործեր է կատարել, սակայն արդեն սպառել է իր բոլոր ռեսուրսները, հաղորդում է Интерфакс–ը։

«Ես չեմ կարծում, որ նրան պետք է կշտամբել։ Նա շատ լավ բաներ է արել Ռուսաստանի համար, բայց հիմա սպառել է իրեն», – այս մասին հինգշաբթի օրը Գորբաչովն ասել է Մոսկվայի պետական համալսարանում կայացած դասախոսության ժամանակ։ Նախկին նախագահի քննադատության թիրախ է դարձել նաև Պետդուման, որտեղ, ըստ նրա, «համատարած կեղծիք է տիրում», որի պատճառով Պուտինը չի կարող հաղթանակ տանել։

Խորհրդային Միության նախկին նախագահը ասել է, որ անհրաժեշտ է փոխել  կառավարման ողջ համակարգը և իր մտահոգությունն է հայտնել այն առիթով, որ եթե ընտրություններից հետո երկրում իրվաիճակը չփոխվի, ապա ողջ ժողովուրդը դուրս կգա հրապարակ։

Ավելի վաղ Գորբաչովը միացել էր Պետդումայի ընտրությունների արդյուքների դեմ բողոքի ընդդիմության պահանջներին։ 

Ինչպես հաղորդում է Газета.Ru–ն, Արևմուտքի կողմից հովանավորվող Ռուսաստանի ամենահայտնի քաղաքական գործչի հայտարարություններն անակնկալի է բերել Ռուսաստանի իշխանություններին, քանի որ այն բազմաթիվ խոշոր քաղաքներում Պետդումայի ընտրությունների արդյունքների դեմ բողոքի ակցիաների և մեղադրանքների լրացուցիչ առիթ է դարձել։