Սուրեն Սուրենյանցին կալանավորել են

Երևանի Կենտրոն Նորք-Մարաշ վարչական շրջանների ընդհանուր իրավասության դատարանը՝ նախագահությամբ Մխիթար Պապոյանի, շուրջ 1,5 ժամ խորհրդակցական սենյակում մնալուց հետո՝ վերադառնալով հրապարակել է իր որոշումը: Ըստ այդմ, Սուրեն Սուրենյանցի նկատմամբ ընտրված խափանման միջոց չհեռանալու ստորագրությունը փոխարինվել է կալանքով: Դատարանը որոշում է կայացրել նաև քրեական գործի վարույթը կասեցնելու և նրա նկատմամբ հետախուզում հայտարարելու մասին: Սուրենյանցին հայտնաբերելուց հետո դատարանը քրեական գործի վարույթը վերսկսելու մասին որոշում կընդունի:

Այսպիսով դատարանը բավարարել է մեղադրողի միջնորդությունը Սուրենյանցի նկատմամբ խափանման միջոց ընտրված չհեռանալու ստորագրությունը կալանքի փոխելու մասին: Խարդախության մեջ մեղադրվող քաղաքագետ Սուրեն Սուրենյանցը այսօր ևս չէր ներկայացել իր գործով դատական նիստին և դատարանը,մինչ նիստը սկսելը՝ այն սկսվեց 40 րոպե ուշացումով, փորձել էր պարզել վերջինիս բացակայության պատճառը: Սուրենյանցը հեռախոսազանգի միջոցով տեղեկացրել է, որ վատառողջ է և կաթիլային ներարկում է ստանում: Դատարանը փորձել էր պարզել, թե որտեղ է գտնվում Սուրենյանցը, վերջինս, դատարանին հավաստիացրել էր, որ Նորքի զանգվածում բնակվող ընկերոջ տանն է, բայց հասցե չէր նշել: Նախորդ նիստին Սուրենյանցի նկատմամբ բերման ենթարկելու որոշում էր կայացվել, սակայն պարզվել էր, որ Սուրենյանցի բնակավայրի դատարանին հայտնի հասցեում նման մարդ չի բնակվում:

Ըստ տեղեկությունների` քիչ առաջ Սուրեն Սուրենյանցը կալանավորվել է:

Աղբյուրը` maxinfo.am: