Ոստիկանը խնդրում է ավելի մեղմ կամ պայմանական պատիժ նշանակել

ՀՀ ոստիկանության Ճանապարհային ոստիկանություն ծառայության վարչական գործունեության ավագ տեսուչ Հայկ Տոնոյանին ՀՀ ՀՔԾ հատկապես կարևորագույն գործերի ավագ քննիչ Ա.Երեմյանի` 23.04.2013 թվականի որոշմամբ մեղադրանք էր առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ առանձնապես խոշոր չափերով յուացնելը կամ վատնելը, և 315-րդ հոդվածի 1-ին մասով՝ պաշտոնեական անփութությունը: Ըստ մեղադրանքի` նա, պաշտոնեական դիրքն օգտագործելով, 2010 թվականից մինչև 2012 թվականն ընկած ժամանակահատվածում կեղծ անդորրագրեր կազմելու միջոցով յուրացրել է վարչական իրավախախտումներ կատարած անձանցից գանձված և պետբյուջե վճարելու համար ի պաշտոնե նրան վստահված առանձնապես խոշոր չափերով' 5.216.000 ՀՀ դրամ գումարը:

Բացի այդ, հիշյալ ժամանակահատվածում ծառայության նկատմամբ անբարեխիղճ ու անփույթ վերաբերմունքի հետևանքով իր պարտականությունները չի կատարել, այն է' նշանակված տուգանքի գումարները բռնագանձելու համար ճանապարհային երթևեկության կանոնները խախտած վարորդների վերաբերյալ կազմված, սակայն չվճարված, վիճահարույց 174 արձանագրությունները սահմանված կարգով ՀՀ վարչական դատարան չի ուղարկել, ինչի հետևանքով անզգուշությամբ էական վնաս է պատճառել անձանց և պետության օրինական շահերին` այդ կերպ ոտնահարելով քաղաքացիների սահմանադրական իրավունքներն ու հեղինակազրկելով իշխանության մարմիններին:

Մինչ դատաքննությունն սկսելը, ամբաստանյալ Հայկ Տոնոյանը միջնորդել էր դատական քննությունն անցկացնել արագացված կարգով՝ հայտարարելով, որ առաջադրված մեղադրանքն իրեն պարզ է, համաձայն է մեղադրանքի հետ:

ՀՀ Լոռու մարզի ընդհանուր իրավասության առաջին ատյանի դատարանը՝ դատավոր Ս.Բաղդասարյանի նախագահությամբ, 2013 թվականի հուլիսի 11-ի դատավճռով ամբաստանյալ Հայկ Տոնոյանին մեղավոր է ճանաչել` ՀՀ քրեական օրենսգրքի 179-րդ հոդվածի 3-րդ մասի 1-ին կետով և 315-րդ հոդվածի 1-ին մասով նախատեսված հանցագործությունների կատարման մեջ:

Դատարանը նրան դատապարտել է ազատազրկման` 5 տարի ժամկետով՝ առանց գույքի բռնագրավման, և տուգանքի` 300.000 դրամի չափով: Ամբաստանյալ Հայկ Տոնոյանի գույքի վրա ՀՀ ՀՔԾ հատկապես կարևորագույն գործերի ավագ քննիչ Ա.Երեմյանի' 23.04.2013 թվականի որոշմամբ դրված արգելանքը դատավճռով վերացվել է:

Պատիժ նշանակելիս դատարանը ամբաստանյալ Հայկ Տոնոյանի պատասխանատվությունը և պատիժը մեղմացնող հանգամանքներ է դիտել այն, որ նա նախկինում դատված չի եղել, բնութագրվում է դրականորեն, հանցագործությամբ պատճառված նյութական վնասն ամբողջությամբ կամովին հատուցել է:

Հայկ Տոնոյանը դատավճռի դեմ բողոք է ներկայացրել ՀՀ վերաքննիչ քրեական դատարան՝ միջնորդելով փոփոխել իր վերաբերյալ 11.07.2013թ. դատավճիռը և իր նկատմամբ օրենքով նախատեսվածից ավելի մեղմ պատիժ նշանակել կամ պատիժը պայմանականորեն չկիրառել:

«Փաստինֆո»