Բաքուն օգտագործում է ՄԱԿ-ի ԱԽ-ի նախագահության ամբիոնը Հայաստանի վրա հարձակվելու նպատակով

Ադրբեջանը ՄԱԿ-ում Անվտանգության խորհրդի նախագահության ժամանակավոր պարտավորությունները ստանձնելուց մեկ օր անց արդեն օգտագործում է այդ հարթակը Հայաստանի վրա հարձակումներ կատարելու համար. գրում է Asbarez պարբերականը:

Ադրբեջանը ՄԱԿ-ի ամբիոնից մեղադրում է Հայաստանին Սիրիայի փախստականներին Լեռնային Ղարաբաղի տարածքում բնակեցնելու համար:

ՄԱԿ-ում Ադրբեջանի դեսպանը հայտարարել է, թե Հայաստանը շատ վտանգավոր խաղ է սկսել` սիրիացի փախստականներին բնակեցնելով Լեռնային Ղարաբաղում:

Այս տարվա օգոստոս ամսին ադրբեջանական ԶԼՄ-ները, հղում կատարելով Սիրիայի ընդդիմադիր լրատվական կայքերին, գրել էին, թե Սիրիայի ապստամբ գրոհայինների շարքերում կառավարական բանակի դեմ մարտնչում է 60 ադրբեջանցի: Նույն աղբյուրը նաև նշում էր, որ 30 ադրբեջանցի է զոհվել Սիրիայում շարունակվող ներքին բախումների արդյունքում:

Համաձայն այդ նույն աղբյուրի` ադրբեջանցի գրոհայինների մեծ մասը «Ջեյշ ալ Մուհաջիրին ոա Անսար» կոչվող խմբավորման անդամ է, որոնց ղեկավարում է Ադրբեջանից Աբու Յահան:

Ադրբեջանական լրատվամիջոցները հուլիս ամսին դեռ հայտնել էին, որ 400 ադրբեջանցի գրոհայիններ, որոնց թվում` 3 կին, կռվում են Սիրիայում, Աֆղանստանում և Պակիստանում ահաբեկչական խմբավորումների շարքերում:

ՄԱԿ-ում ՀՀ ներկայացուցիչը հայտարարել էր, որ Հայաստանում կա ավելի քան 10.000 սիրիացի փախստական, սակայն պնդումներն առ այն, թե նրան բնակեցվել են Լեռնային Ղարաբաղում, սուտ են և խեղաթյուրված:

Անցյալ շաբաթ Ադրբեջանի արտգործնախարար Էլմար Մամեդյարովը ՄԱԿ-ի Գլխավոր ասամբլեայի ամբիոնից դարձյալ խոսեց սիրիացի փախստականների մասին, որոնք բնակեցվում են ԼՂՀ տարածքում, ինչն ապացուցում է Հայաստանի կողմից «Ադրբեջանի հողերը» զավթելու նպատակադրված քաղաքականությունը:

ՄԱԿ-ում ՀՀ ներկայացուցիչ Կարեն Նազարյանը AFP-ին տված հարցազրույցում հայտնել էր, որ Ադրբեջանն օգտագործում է սիրիական ճգնաժամը իր քաղաքական նպատակների համար, և նշել, որ ադրբեջանական կողմի մեղադրանքները սուտ են և աղավաղում են ճշմարտությունը: