Տիգրան Առաքելյանն այսօր ազա՞տ կարձակվի

Այսօր` հոկտեմբերի 7-ին, Վերաքննիչ քրեական դատարանում՝ դատավոր Եվա Դարբինյանի նախագահությամբ, շարունակվեց Հայ ազգային կոնգրեսի երիտասարդ ակտիվիստների գործով դատավարությունը:

Տիգրան Առաքելյանը միջնորդություն ներկայացրեց նորից հարցաքննել գործով տուժող ոստիկաններից Շահեն Հարությունյանին: Միջնորդությունը դատարանի կողմից բավարարվեց:

Այնուհետև Տիգրան Առաքելյանը և պաշտպան Մուշեղ Շուշանյանը միջնորդություն ներկայացրին անցկացնել կրկնակի դատաբժշկական փորձաքննություն՝ պարզելու, թե արդյոք ոստիկան Տիգրան Ավետիսյանը ստացել է քթի բազմաբեկոր կոտրվածք և եղել է շատ ծանր վիճակում: Միջնորդությունը միտված էր պարզելու` ունի արդյոք այդ մարդը կոտրվածք, թե` ոչ: Պահանջում էր, որ պաշտպանի հետ անպայման գնան կլինիկա և ռենտգենի պատասխանն անպայման ստանան պաշտպան Մուշեղ Շուշանյանի ներկայությամբ:

Տիգրան Առաքելյանը, միջնորդությունը մեկնաբանելով, ասաց, որ հենց ոստիկանության լրատվական ծառայության պատրաստած ռեպորտաժում երևում է, որ դեպքից հետո գրեթե 4-5 ժամ տուժող Տիգրան Ավետիսյանը ոստիկանական տեղամասում է մնացել` ընդամենը մի փոքր արյունոտված շրթունքով:

Դատարանը հեռացավ խորհրդակցական սենյակ` երկրորդ միջնորդությունը քննության առնելու:

Նշենք, որ կարծիք կա, որ Տիգրան Առաքելյանը հենց այսօր կարող է ազատ արձակվել:

Հիշեցնենք, որ նախորդ նիստի ընթացքում դատավորը մերժել էր մի շարք երաշխավորագրեր՝ Տիգրան Առաքելյանի խափանման միջոց կալանքով փոխելու վերաբերյալ: