Պուտինը «Հականարնջագույն» հանրահավաքի կազմակերպիչներին փոխանցել է տուգանքի գումարը

Ռուսաստանի վարչապետ Վլադիմիր Պուտինը «Поклонная» բլրում կայացած հանրահավաքի կազմակերպիչներին հազար ռուբլի է փոխանցել հանրահավաքի մասնակիցների քանակը գերազանցելու համար սահմանված տուգանքը վճարելու համար։ Այս մասին հաղորդում է «РИА Новости» գործակալությունը։

Հանրահավաքի կազմակերպիչ, «Ռուսաստանի հայրենասերներ» կուսակցության փոխնախագահ՝ Նատալյա Կոռնևան, տուգանքը վճարել է փետրվարի 11–ին։ Նրա խոսքերով՝ Պուտինը գումարը փոխանցել է ժողովրդական շտաբի միջոցով։

«Հարցը գումարի մեջ չէ, գումարը մեծ չէ։ Նա բարոյական աջակցություն ցույց տվեց այն մարդկանց, որոնք ելույթ ունեցան երկրի համար և նրանց, ովքեր նրան աջակցեցին։ Դրա համար մենք շնորհակալ ենք իրենից»,– հայտարարել է Կոռնևան։

Մոսկվայի «Поклонная» բլրում «Հականարնջագույն» հանրահավաքը կայացել էր փետրվարի 4–ին։ Մասնակիցները կոչ էին անում մարդկանց մարտի 4–ին կայանալիք նախագահական ընտրություններում քվեարկել Պուտինի օգտին։

Հանրահավաքի մասնակիցները մոսկովյան իշխանությունների հետ պայմանավորվել էին անցկացնել 15 հազարանոց հանրահավաք, սակայն ոստիկանության հաշվարկներով «Поклонная» բլուր էին եկել 140 հազար մարդ։ Դրա հետ կապված հանրահավաքի կազմակերպիչներին մեղադրել էին հանրահավաքի կանոնները խախտելու մեջ։