Ֆրանսիայից դեպորտի ենթարկված հայ աշակերտի հարցազրույցը Gazeta.ru-ին

Ռուսական Gazeta.ru գործակալությունը հարցազրույց է վերցրել հայ աշակերտից, որին դեպորտի ենթարկելուց հետո այնտեղ «ուսանողական բունտ» էր տեղի ունեցել: Իրենց ընկերոջը երկրից հետ ուղարկելու դեմ բողոքի էր դուրս եկել ավելի քան 10 հազար աշակերտ, իսկ շուրջ 20 դպրոց դադարեցրել էր իր աշխատանքը: Բողոքողների մեծ մասը նույնպես ներգաղթյալներ են, ովքեր անհանգստացած են իրենց ճակատագրի համար: Իշխանությունները դեռևս չեն պատրաստվում տեղի տալ:

Խաչիկը հիմա Հայաստանում է և զինվորական բուժզննում է անցնում բանակ զորակոչվելուց առաջ: Ֆրանսիայում նա սովորում էր Փարիզի լիցեյներից մեկում: 

Լրագրողի հարցերին պատասխանելիս Խաչիկը նշել է, որ արդեն 3 տարուց ավել է, ինչ ինքն ընտանիքով ապրում է Ֆրանսիայում: Իսկ այն հարցին, թե ինչու է ինքը դեպորտի ենթարկվել, նա պատասխանել է.

«Երեք շաբաթ առաջ ես զբոսնում էի ընկերներիս հետ: Զբոսանքի ժամանակ ինձ մոտեցավ ժանդարմերիայի աշխատակիցը և պահանջեց փաստաթղթերս: Իսկ ես չունեի դրանք: Հետո նրանք իրենց աղբյուրներով ճշտեցին իմ անուն-ազգանունը»:

Պարզվել է, որ Հայաստանում ոստիկանությունը նրան որոնում է զինվորական ծառայությունից խուսափելու համար: Նրան ձերբակալել են և տեղափոխել օդանավակայան: «Երևանի օդանավակայանից ինձ տարել են Վեդիի զինվորական մաս, իսկ մի քանի օր անց, այդուհանդերձ, բաց են թողել, և ես հաստատվեցի տատիկիս ու պապիկիս տանը»:

«Իսկ ճի՞շտ է արդյոք, որ Ֆրանսիայում Դուք մեղադրվում եք գողության համար»,- հարցրել է լրագրողը, ինչին նա պատասխանել է, որ նման բան չի եղել:

Խաչիկը նշել է, որ ինքը չի խուսափում բանակից, պատրաստվում է ծառայել, իսկ Ֆրանսիան իր 2-րդ հայրենիքն է համարում, ուր մնացել են նրա ծնողները:

«Ես նաև իմ ապագան այնտեղ եմ տեսնում»,-ասել է Խաչիկը:

Մեկնաբանելով իր դեպքի կապակցությամբ Փարիզում բարձրացած աղմուկը՝ նա նշել է, որ կարծում է, թե իր դեպքը պարզապես առիթ էր հանրության համար՝ ցույց տալու իրենց դժգոհությունը Ֆրանսիայի վարած միգրացիոն քաղաքականության դեմ: