Հայաստանը գենդերային հավասարության տեսակետից աշխարհում 94-րդն է. Gender Gap Index 2013

Համաձայն Gender Gap Index - GGI 2013-ի կազմած զեկույցի` Հայաստանն աշխարհում գենդերային հավասարության մակարդակով 136 երկներից կազմված վարկանշային աղյուսակում զբաղեցնում է 94-րդ տեղը: 

Վարկանշային աղյուսակը կազմող փորձագետները, ուսումնասիրելով տարբեր երկրներով տղամարդկանց և կանանց իրավունքները և համեմատելով դրանք միմյանց հետ, եզրակացություններ են արել, թե որքանով են դրանք տարբեր` ըստ որոշ ցուցանիշների:

Մասնավորապես, նրանք դիտարկել են կանանց առողջության և երկարակեցության, քաղաքական և տնտեսական կյանքին կանանց ցուցաբերած մասնակցության, կրթական մակարդակին վերաբերող ցուցանիշները: Ըստ զեկույցի` 2013-ի առաջին պատվավոր հորիզոնականը բաժին է ընկել Իսլանդիային: 2-րդ տեղում է Ֆինլանդիան, իսկ 3-ում` Նորվեգիան:

Շվեդիան 4-րդ հորիզոնականում է, իսկ լավագույն հնգյակը եզրափակում է Ֆիլիպինները: Ընդհանուր առմամբ` Հյուսիսային Եվրոպան առաջատար դիրքեր է զբաղեցնում: Լավագույն տասնյակից 6 առաջատար դիրքերը զբաղեցնում են Հյուսիսային Եվրոպայի երկրները: Տասնյակը եզրափակում են Դանիան` 8-րդ, Շվեյցարիան` 9-րդ, և Նիկարագուան` 10-րդ հորիզոնականներով: 

Ինչ վերաբերում է Հայաստանին, ապա այստեղ մեր երկիրը կրթության ոլորտում կանանց և տղամարդկանց իրավահավասարության տեսանկյունից առավելապես բարեհաջող դիրքերում է: Օրինակ` տարրական, միջնակարգ և բարձրագույն կրթություն ստանալու առումով Հայաստանը 29-րդ հորիզոնականում է: Իսկ քաղաքական ոլորտում շատ առավել հետին շարքերում է հայտնվել: Օրինակ` խորհրդարանում կանանց ակտիվության տեսանկյունից մենք 108-րդ հորիզոնականում ենք: 

Կառավարության մեջ ներգրավված կանանց քանակի ցուցանիշներից ելնելով` վարկանշային աղյուսակում մեզ շնորհել են 93-րդ հորիզոնականը: 

Մեր հարևան երկներից Ադրբեջանը հայտնվել է 99-րդ հորիզոնականում է, Վրաստանը` 86-րդ, Թուրքիան` 120-րդ, իսկ Իրանը`130-րդ: Ռուսաստանը 61-րդ տեղում է: