Վրաստանը նախագահ ընտրեց, սակայն իրական իշխանությունը կլինի ապագա վարչապետի ձեռքերում. New York Times

The New York Times պարբերականը, անդրադառնալով Վրաստանում տեղի ունեցած նախագահական ընտրություններին, մի հոդված է հրապարկել, որտեղ, մասնավորապես, ասվում է. «Համաձայն Վրաստանի Սահմանադրության մեջ կատարված փոփոխությունների`այսուհետ երկրի քաղաքական իշխանության առավել ուժգին լծակները պատկանելու են ոչ թե նախագահին, այլ վարչապետին, սակայն ով է զբաղեցնելու այդ պաշտոնը, դեռևս հայտնի չէ, քանի որ գործող վարչապետ Իվանիշվիլին մոտ օրերս հրաժարական է տալու և իր աթոռը հանձնելու է դեռևս անհայտ իրավահաջորդին»,-գրում է հոդվածագիր Հերշենհորնը:

Վրաստանի ԿԸՀ-ի կողմից քվեաթերթիկների 97%-ը հաշվելուց հետո 62% ձայների առավելությամբ հաղթանակ է տանում վարչապետ Բիձինա Իվանիշվիլիի կողմից առաջադրված Գեորգի Մարգվելաշվիլին:

«Սակայն ո՞ւմ կառաջադրի իր փոխարեն վարչապետ Իվանիշվիլին»,-հարցնում է հոդվածագիրը:

Սա շատ ավելի կարևոր հարց է, քան նախագահական ընտրությունների արդյունքները, քանի որ խորհրդարանի կողմից ընտրվող վարչապետը լիակատար գործադիր իշխանություն է ունենալու երկրի ներքին և արտաքին քաղաքականության ոլորտում: «Վրաստանի նախագահը կմնա պետության ղեկավարի և Զինված ուժերի գերագույն գլխավոր հրամանատարի պաշտոնում, սակայն՝ առանց օրինագծեր ներկայացնելու և բյուջեի նախագծեր մշակելու իրավունքի»:

Իր կառավարության վերջին մեկ տարին Սաակաշվիլին անցկացրեց ընդդիմադրի դիրքերում: «Սակայն, այսուհանդերձ, ընտրությունների արդյունքններն ընդունելն ու 2 նախագահական շրջանից ավել լիազորություններ չպահանջելն ապահովեց իշխանության՝ խաղաղ և ժողովրդավարական ճանապարհով հանձնելու գործընթացը, ինչը շատ բացառիկ երևույթ է հետխորհրդային տարածաշրջանում»,-գրում է հոդվածագիրը:

Իվանիշվիլին այսօր հանդես էր եկել հայտարարությամբ, որտեղ նշված էր, որ ինքը երկուշաբթի օրը չի պատրաստվում տալ նոր վարչապետի անունը:

Այսուհանդերձ, շրջանառվող լուրերում առավել հաճախ պտտվում են առողջապահության ու աշխատանքի և սոցիալական հարցերի նախարար Դավիդ Սերգեենկոյի և ներքին գործերի նախարար Իրաքլի Գարիբաշվիլիի անունները. գրում է պարբերականը: