Վենեդիկտովին ու Վարֆոլոմեևին հեռացնում են «Էխո Մոսկվի»-ի տնօրենների խորհրդից

«Գազպրոմ-մեդիա»-ն, որին պատկանում է «Էխո Մոսկվի»-ի բաժնետոմսերի վերահսկիչ փաթեթը, պահանջել է ռադիոընկերության տնօրենների խորհրդի վաղաժամ հրաժարականը և նրանց փոխարինումն «անկախ» մարդկացով։ Այդ մասին Twitter-ի իր միկրոբլոգում գրել է «Էխո Մոսկվի»-ի գլխավոր խմբագիր Ալեքսեյ Վենեդիկտովը։

Տնօրենների խորհուրդը կլքեն ինքը՝ Վենեդիկտովն ու նրա առաջին տեղակալը՝ Վլադիմիր Վարֆոլոմեևը։ Վենեդիկտովն իր հաղորդագրությունում նշել է, որ գլխավոր խմբագրի պաշտոնից հրաժարվելու հարց դրված չէ: 

Հիշեցնենք, որ «Էխո Մոսկվի»-ն փակ բաժնետիրական ընկերություն է, որի բաժնետոմսերի 66 տոկոսը պատկանում է «Գազպրոմ մեդիա»-ին, 34 տոկոսը՝ ռադիոընկերության լրագրողներին, որից 18 տոկոսը պատկանում է Վենեդիկտովին։

Հատկանշական է, որ «Էխո Մոսկվի»-ն աչքի է ընկնում անաչառ լրատվության ապահովմամբ, և Ռուսաստանում վերջին մի քանի ամիսների ընթացքում տեղի ունեցող իրադարձությունները, մասնավորապես՝ ռուսական ընդդիմության գործողությունները, լուսաբանել է ողջ ծավալով։