Սոբչակը ցանկանում է սովորել պայթուցիկ լուծույթով շշեր պատրաստել

Ինչպես արդեն տեղեկացրել էր Լուրեր.com–ը, փակվել է հայտնի ռուս հաղորդավարուհի Կսենիա Սոբչակի վարած, բոլորովին վերջերս եթեր մտած «Պետդեպ» (Госдеп) հաղորդումը՝ ռուս ընդդիմադիր գործիչ Ալեքսեյ Նավալնուն այդ հաղորդմանը հրավիրելու պատճառով։ Սոբչակը ապշած է եղել այս որոշումից և նշել է, որ չգիտի նույնիսկ թե ինչն է եղել դրա պատճառը։

MTV հեռուստաընկերության պաշտոնական հաղորդագրության մեջ նշված է, որ հաղորդումը քաղաքական բնույթի էր, իսկ իրենց հեռուստադիտողները չեն հետաքրքրվում քաղաքականությամբ։ Դրան իր բլոգում Սոբչակը հակադարձել է՝ գրելով, որ առաջին իսկ հաղորդման վարկանիշը 2 անգամ գերազանցել է MTV-ի հաղորդումների միջին վարկանիշը։

Ընդդիմադիր գործիչ Ալեքսեյ Նավալնին արդեն ներողություն է խնդրել Սոբչակից, որ իր պատճառով փակվել է նրա հաղորդումը։ Կսենիան իր հերթին նշել է, որ նման քայլերով իշխանություններն իրեն կդարձնեն ծայրահեղ ընդդիմադիր։ Հաղորդավարուհու խոսքերով՝ նա ցանկանում է Նավալնուն խնդրել, որ իրեն սովորեցնի պայթուցիկ լուծույթով շշեր պատրաստել, հայտնում է uznayvse.ru կայքը։