Ռուսաստանը 3 ամիսը մեկ վերանայելու է Ուկրաինային մատակարարվող գազի գինը

Ռուսաստանն ամեն եռամսյակը մեկ վերանայելու է Ուկրաինային մատակարարվող գազի գինը. տեղեկացնում է Зеркало недели պարբերականը` հղում կատարելով ուկրաինական պատվիրակության իր աղբյուրներն, որոնք մասնակցել էին Մոսկվայի և Կիևի միջև պայմանագրի պայմանների վերանայման բանակցություններին: 

Ուկրաինային մատակարարվող կապույտ վառելիքի նոր գնի մասին հայտնի էր դարձել դեկտեմբերի 17-ին նախագահներ Վլադիմիր Պուտինի և Վիկտոր Յանուկովիչի  հանդիպման ավարտից հետո: Ինչպես հայտարարել էր ռուս նախագահը,  Կիևն այսուհետ Ռուսաստանից վառելիք է ստանալու հազար խորանարդ մետրի դիմաց վճարելով 268,5 դոլար այն դեպքում, երբ նախքան այդ վճարում էր 400 դոլար: 

Նոր գինը սահմանվել է` ի համալրում 2009-ին կնքված համաձայնագրի, որի պայմանների վերանայմանն էր ձգտում Կիևը Յանուկովիչի` իշխանության գալուց հետո: Թե ինչ ժամկետներով է գործելու նոր սակագինը, չի հստակեցվում:

Պուտինը նշել է, որ գազի գնի իջեցումը ժամանակավոր բնույթ է կրում: