Տասնվեցամյա հոկեյիստը տափօղակի հարվածից գիտակցության չգալով՝ մահացել է

Ռուսաստանի «Օլիմպիա» հոկեյի թիմի խաղացող տասնվեցամյա Մաքսիմ Կոպոսովը մահացել է՝ գիտակցության չգալով, հաղորդում է «Ռիա նովոստին»՝ հղում անելով շրջանային սպորտային կոմիտեի մամլո քարտուղարին։

Շաբաթ օրը՝ փետրվարի 11-ին «Օլիմպիա» մանկապատանեկան մարզադպրոցում տեղի ունեցող հոկեյի խաղի ժամանակ Մաքսիմ Կոպոսովը կրծքավանդակին տափօղակով հարված էր ստացել, ինչի պատճառով պատանի մարզիկը գիտակցությունը կորցրել էր։

«Հազարավոր մարդիկ այս օրերին ամեն ինչ անում էին Մաքսիմին փրկելու համար, սակայն Մաքսիմը չկարողացավ կոմայից դուրս գալ և այսօր նրա սիրտը կանգնել է», – հայտնել է մամլո քարտուղար Վոլկոնիտինան։

Նման դեպք վերջին անգամ Ռուսաստանում գրանցվել էր 2008–ին, երբ խաղի ավարտից երեք րոպե առաջ պահեստայինների նստարանին նստած Ալեքսեյ Չերեպանովը սրտի կաթվածից մահացել էր։