Պուտինը հանդես է եկել նոր հոդվածով. այս անգամ նա առաջարկում է անցնել պրոֆեսիոնալ բանակի

Ռուսաստանի ներկայիս վարչապետ, նախագահի թեկնածու Վլադիմիր Պուտինը հանդես է եկել նոր հոդվածով, որում անդրադարձել է ռուսաստանյան զինված ուժերի կառուցվածքին և ազգային անվտանգությանը։ Պուտինը գրել է, որ 2017-ին մեկ միլիոնանոց ռուսական բանակում պետք է լինեն 700 հազար պրոֆեսիոնալ զինվորականներ, իսկ դրանից երեք տարի անց զորակոչիկների թիվը պետք է կրճատվի ևս 145 հազարով, հաղորդում է «Российская газета»-ն։

«Մեր նպատակն է ամբողջությամբ պրոֆեսիոնալ բանակին անցնելը»,-ասված է հոդվածում։ 

Պուտինը նաև գրել է, որ բանակում կարգուկանոնը պահպանելու նպատակով կստեղծվի Ռազմական ոստիկանություն։ Իսկ բանակում ծառայությունը հեղինակավոր դարձնելու նպատակով վարչապետն առաջարկել է հայրենիքի առջև իրենց պարտքը կատարած քաղաքացիներին լավագույն բարձրագույն ուսումնական հաստատություններ ընդունվելիս լրացուցիչ իրավունքներ ընձեռել։ 

Հիշեցնենք, որ նախագահի թեկնածու Պուտինն ավելի վաղ մի շարք թերթերում հրապարակել է տարբեր թեմաներով մի քանի հոդված, ինչը Ռուսաստանի ընդդիմադիրները որակել են իբրև ընտրությունների մասին օրենքի կոպիտ խախտում, քանի որ դրանք չեն վճարվում թեկնածուի նախընտրական շտաբի կողմից։ Երկրի Կենտրոնական ընտրական հանձնաժողովում, սակայն, հոդվածների հրապարակումն ապօրինի չեն համարում՝ պնդելով, որ այդ երևույթը ոչ թե քարոզչություն է, այլ՝ վերլուծություն։