Ռուսաստանի նախագահի թեկնածուները Պուտինի նախընտրական շտաբի կողմից առաջարկված հանրային պայմանագիրը չեն ստորագրի

Ռուսաստանի նախագահի թեկնածուներ Լիբերալ–դեմոկրատական կուսակցության թեկնածու Վլադիմիր Ժիրինովսկին, Կոմունիստական կուսակցության թեկնածու Գենադի Զյուգանովը և «Արդար Ռուսաստան» կուսակցության թեկնածու Սերգեյ Միրոնովը հայտարարել են, որ մտադիր չեն ընդունել նախագահի մեկ այլ թեկնածու Վլադիմիր Պուտինի նախընտրական շտաբի ներկայացուցչի՝ հանրային պայմանագիր կնքելու առաջարկը։ 

Պուտինի վստահելի անձանցից Սերգեյ Շոյգուն շաբաթ օրը նախագահի բոլոր թեկնածուների միջև հանրային պայմանագիր կնքելու առաջարկով էր հանդես եկել։ 

«Դա պայմանագիր չէ, դա անարգանք է», – հայտարարել է նախագահի կոմունիստ թեկնածու Գենադի Զյուգանովը։ 

 Ժիրինովսկու նախընտրական շտաբի ներկայացուցիչը Սերգեյ Շոյգուի առաջարկը «հերթական ֆարս է» համարել։ Իսկ «Արդար Ռուսաստանի» թեկնածու Սերգեյ Միրոնովը հայտարարել է, որ «ներկայիս տարբերակով առաջարկն ինքը չի ընդունում», – հաղորդում է Газета.Ru–ն։

Թեկնածուներից Միխայիլ Պրոխորովը նույնպես չի ընդունել այդ առաջարկը՝ այն համարելով «գործող իշխանությունների կողմից մյուս թեկնածուների միջոցով կեղծվելիք ընտրությունները լեգիտիմացնելու փորձ»։