Մասնագետները Հայաստանում ջրծաղկի համաճարակային իրավիճակը համարում են նորմալ

Հայաստանում ջրծաղկի համաճարակ չկա, նկատվում է միայն սեզոնային բարձրացում: Այս մասին «Արմենպրես»-ի հետ զրույցում ասաց ՀՀ առողջապահության նախարարության հիգիենիկ հակահամաճարակային տեսչության վարակիչ և ոչ վարակիչ հիվանդությունների համաճարակաբանության բաժնի գլխավոր մասնագետ Լուսինե Պարոնյանը: Նա նշեց, որ ամեն տարի հատկապես ձմռանն ու գարնանը նկատվում է հիվանդության բարձրացում: «Դեկտեմբերին գրանցվել է ջրծաղկի դեպքերի կտրուկ ավելացում, ինչը նույնպես նորմալ է: Հունվարին արդեն նվազում է նկատվում»,- ասաց նա: Պարոնյանի խոսքով` ջրծաղիկը երկրորդ անգամ մարդու մոտ կրկնվում է միայն ծայրահեղ հազվադեպ դեպքերում:

Ջրծաղիկը սուր վարակիչ, վիրուսային ծագման, օդակաթիլային եղանակով փոխանցվող հիվանդություն է: Այն օժտված է բարձր վարակելիությամբ և տարածված է ամենուր: Մեղմ կլիմայական պայմաններում բնակչության առնվազն 90%-ը հիվանդանում է ջրծաղիկով մինչև 15 տարեկանը, որոնցից առնվազն 95%-ը' մանկական տարիքում:

Վարակի աղբյուրը հիվանդ մարդն է: Վիրուսը անկայուն է շրջակա միջավայրում, որի հետևանքով, որպես կանոն, վարակը չի փոխանցվում երրորդ անձի և հիվանդի օգտագործած անձնական իրերի միջոցով: Հիվանդության գաղտնի շրջանը 10-21 օր է: Հիվանդությունն հիմնականում ընթանում է թեթև, հատկապես' մանկական տարիքում, մեծահասակների մոտ այն ընթանում է ավելի ծանր: Սկզբում դիտվում է 1 օր տևողությամբ ընդհանուր նախանշանների շրջան, որն արտահայտվում է թուլությամբ, գլխացավով, ախորժակի կորստով, ոչ շատ բարձր ջերմությամբ, ապա սկսվում է ցանավորման շրջանը' ջերմության բարձրացում, բշտիկավոր ցան ամբողջ մարմնի շրջանում: Հիվանդը վարակիչ է մինչև վերջին կեղևի ընկնելը: Կեղևները թափվում են 6-8-րդ օրը, որից հետո մնում է սպի: Կարող են լինել նաև ոչ բնորոշ ախտանշաններով' անցան ձևեր: