Reuters․ Թրամփի միգրացիոն արշավը Մինեապոլիսում կաթվածահար է արել ծանր հանցագործությունների դեմ պայքարը

Reuters-ի հետաքննությունը ցույց է տվել, որ Դոնալդ Թրամփի վարչակազմի խոշոր միգրացիոն գործողությունները Մինեապոլիսում լրջորեն խաթարել են ԱՄՆ դաշնային իրավապահների աշխատանքը։ Ըստ հրապարակման՝ միգրացիոն վերահսկողության վրա կենտրոնանալուց հետո կտրուկ նվազել են թմրանյութերի, զենքի և այլ ծանր հանցագործությունների գործերով քննություններն ու դատական հետապնդումները։

Reuters-ի տվյալներով՝ 2026 թվականի հունվարից ապրիլի վերջ դաշնային դատախազները Մինեսոտայում ընդամենը ութ մարդու են մեղադրանք առաջադրել թմրանյութերի կամ զենքի հետ կապված գործերով, մինչդեռ նախորդ տարվա նույն ժամանակահատվածում այդ թիվը 77 էր։ Ընդհանուր առմամբ ծանր հանցագործությունների գործերով մեղադրանք է առաջադրվել 90 անձի՝ մոտ երկու անգամ պակաս, քան մեկ տարի առաջ։ Հաղորդվում է նաև, որ մի շարք դաշնային դատախազներ հրաժարական են տվել, իսկ որոշ գործակալներ դուրս են բերվել հակաթմրանյութային և հակաավազակային խմբերից՝ ներգրավվելով միգրացիոն գործողություններում։

Հոդվածում նշվում է, որ Մինեապոլիսում շուրջ 3000 միգրացիոն գործակալների տեղակայումը մեծ հանրային բողոք էր առաջացրել։ Reuters-ը գրում է, որ գործողությունների ընթացքում դաշնային գործակալների կողմից սպանվել են երկու ամերիկացի ցուցարարներ, ինչը խորացրել է ճգնաժամը։ Տեղական դատախազ Մերի Մորիարտին հայտարարել է, որ դաշնային կառույցներն այնքան ծանրաբեռնված են միգրացիոն հարցերով, որ բարդ քրեական գործերը սկսել են փոխանցել նահանգային իշխանություններին։ Նրա խոսքով՝ դա արդեն դարձել է հանրային անվտանգության խնդիր։