The Guardian-ը հրապարակել է Էրդողանի գաղտնի խոսակցությունները` Գյուլենի «վերջը տալու» մասին

Համաշխարհային առաջատար մամուլը պարբերաբար լուսաբանում է Թուրքիայի վարչապետ Ռեջեփ Թայիփ Էրդողանի և նրա նախկին դաշնակից, ԱՄՆ Փենսիլվանիա նահանգում վտարանդի սուֆի քարոզիչ Ֆեթուլլահ Գյուլենի միջև ընթացող «պատերազմը»: Այս մասին հայտնում է The Guardian պարբերականը:

Թերթը հայտնում է, որ թեև Էրդողանի և Գյուլենի միջև ջերմ հարաբերությունները վերջին տարիներին զգալիորեն սառել են, սակայն եթե անցյալ դեկտեմբերի կեսերին նրանց միջև կոռուպցիոն աղմուկ չծագեր, ապա իրավիճակն այդքան չէր սրվի:

Կառավարության անդամների կոռուպցիոն գործունեությունը բացահայտվելուց հետո Էրդողանը հայտարարեց, որ դա Գյուլենի գաղափարական հետևորդների կողմից իր դեմ սարքված դավադրություն է և կոռուպցիան բացահայտմանը մասնակից հարյուրավոր ոստիկանների ու արդարադատության աշխատակիցների կամ պաշտոնանկ արեց, կամ էլ տեղափոխեց այլ աշխատանքի: 

«Ամենահետաքրքիրն այն է, որ Եվրամիության պաշտոնյաների հետ ունեցած գաղտնի զրույցներում Էրդողանը խոստովանել է Գյուլենի հետ իր բախումը կենաց և մահվան հարց լինելը: Բրյուսելցի պաշտոնյաներն ասել են, որ Էրդողանը հայտարարել է, որ վճռական է «զուգահեռ պետություն» անվանած մարդկանց «վերջը տալու» գործում»,-գրում է թերթը:

The Guardian-ը գրում է, որ որևէ կասկած չկա, որ Էրդողանի թիմի` կոռուպցիայի մեջ թաղված լինելու վերաբերյալ մեղադրանքները ծագում են Գյուլենի ճամբարից, և որ այդ մեղադրանքները ճիշտ են, քանի որ այդ մեղադրանքներն առաջադրել են անվտանգության և արդարադատության համակարգում գտնվող գյուլենական պաշտոնյաները: