Կիրկորովին դատի են տվել չորս կոմպոզիտորներ

Բուլղարացի կոմպոզիտորներ Ալեքսանդր Սավելևը, Դմիտրի Պենևը, Իվան Պեևը և Նայդեն Անդրեևը դատի են տվել երգիչ Ֆիլիպ Կիրկորովին՝ իրենց հեղինակային երգերն առանց թույլտվության կատարելու և դրանց համար հոնորար չվճարելու համար։

Դրանք «Плюс и минус», «Настоящее время», «Воспоминание из детства», «Исповедь» և «Звездная фантазия» երգերն են։  

«Այս երգերը երկար տարիներ երգիչը կատարում է առանց հեղինակների թույլտվության, ինչպես նաև այդ երգերով հանդես է գալիս համերգաշարերի ժամանակ, նույնիսկ իր ձայնասկավառակներում է թողարկում», – հաղորդում է Итар-Тасс-ը՝ մեջբերելով «Եվրոպական հանրության իրավունքների պաշտպանություն» կազմակերպության ղեկավար Չավդար Գագովի խոսքերը։

Ըստ հայցվորների, Կիրկորովը այդ երգերի խոսքերը փոխել, բայց երաժշտությունը նույնն է թողել, և այժմ դրանք կատարում է որպես իր հեղինակային երգեր։

Համաձայն օրենքի, ռուս երգիչին սպառնում է ութ տարվա ազատազրկում կամ 5–ից մինչև 25 հազար եվրո տուգանք։